Prej javësh gjërat te skuderia “Red Bull” nuk po shkojnë ‘mjaltë’. Xhelozia dhe konkurrenca vrastare mes shokëve të ekipit është kthyer në çështje sensitive dhe që po merr vëmendjen në botën e sportit dhe garave Formula 1. Sergio Perez kërkon përgjigje se si Max Verstappen përfundoi shumë “më i fortë” se ai në Çmimin e Madh të Miami dhe dëshiron një hetim për këtë çështje në skuderinë “Red Bull”. Ka qenë një betejë e ngushtë gjatë gjithë vitit mes Perez dhe Verstappen deri më tani, me Verstappen që fitoi në Miami paçka se u nis nga vendi i nëntë.
Shokët e skuadrës së “Red Bull” përfunduan në Miami të parët, me vetëm disa pikë që i ndajnë në krye të kampionatit duke fituar dy gara secili. Verstappen iu desh të mjaftonte me vendin e nëntë në garën e së dielës, ndërsa Perez filloi në pole. Megjithë atë avantazh të madh që nga fillimi, Perez nuk ishte në gjendje të krijonte një epërsi ndaj Verstappen. Meksikani ka ngritur disa pyetje që dëshiron t’i bëjë Red Bull-it përpara Çmimit të Madh të Emilia Romagna-s në Itali (21 maj). “Në përgjithësi, Verstappen ishte më i fortë se unë këtë të dielë. Ne duhet të hetojmë pse ishte kështu dhe gjatë fundjavës së garës në Imola ne duhet të kthehemi në nivelin tonë normal,” tha Perez.
