Një ngjarje e pazakontë është regjistruar në plazhin e Marina di Raguzës, në Siçili, ku rreth 700 mijë euro cash përfunduan në det pasi u hodhën nga një motoskaf që po i afrohej Roja Bregdetare italiane.
Sipas autoriteteve italiane, gjithçka nisi kur motoskafi mbeti pa karburant pranë portit të Marina di Raguzës. Në bord ndodheshin katër persona, ndërsa dy prej tyre zbritën në breg për të siguruar karburant. Në anije mbetën një burrë dhe një i mitur.
Kur Roja Bregdetare iu afrua mjetit lundrues, burri që ndodhej në bord nisi të hidhte në det çanta të mbushura me kartëmonedha.
Rryma i nxori ato drejt bregut, ku pushuesit u futën në ujë për të mbledhur paratë, përpara se zona të izolohej nga policia. Autoritetet arritën të rikuperojnë pothuajse të gjithë shumën.
Katër personat u shoqëruan për t’u marrë në pyetje, ndërsa motoskafi u sekuestrua për ekspertizë.
