Portali i punësimit, grafiku me datat e testimit për 5 profilet mjekësore

Testimet për punësimet e reja në shëndetësi nisin të hënën. Qendra e Shërbimeve të Arsimit ka zbardhur tashmë grafikun me datat e testimeve për të gjithë profesionistët e shkencave mjekësore teknike të profileve infermieri, fizioterapi, mami, logopedi, teknik laboratori, si dhe teknik imazherie, të cilët janë pjesë e garës për vendet e lira të punës në strukturat mjekësore publike të të gjitha niveleve nëpërmjet portalit të punësimit “Infermierë për Shqipërinë”. Për të gjashtë profilet është shpallur edhe lista zyrtare e kandidatëve që plotësojnë kushtet për të zhvilluar provimin e informatizuar të punësimit, ku për secilin prej tyre është përcaktuar edhe ora konkrete se kur duhet të paraqiten në ambientet e QSHA-së për të plotësuar testin.

Provimet do të nisin me infermierët. Për shkak të numrit të madh të kandidatëve që janë në garë, për këtë specialitet provimet do të vijojnë për 12 ditë me radhë. Kalendarin e detajuar të datave të testimit për secilin specialitet e gjeni të plotë në vijim të shkrimit. Janë 1611 kandidatët që garojnë për punësimet e reja në strukturat publike mjekësore të të gjitha niveleve (qendra shëndetësore, spitale, poliklinika ) në këtë profil. Ndërkohë që në faqen zyrtare të kësaj qendre gjendet e plotë edhe lista e kandidatëve që do të hyjnë në testim, duke specifikuar për secilin prej tyre edhe orën se kur duhet të paraqitet për të dhënë provimin.

“Në lidhje me orarin e pjesëmarrjes në provim, ju bëjmë me dije se orari do të jetë i përcaktuar për çdo kandidat dhe nuk do të ketë ndryshime orari përtej planifikimit të publikuar. Provimet do të zhvillohen me tre turne çdo ditë, sipas grafikut të detajuar. Të gjithë kandidatët e regjistruar, duhet  të verifikojnë paraprakisht identitetin dhe orarin e pjesëmarrjes në provim, në faqen zyrtare në adresën www.qsha.gov.al ”, bëjnë me dije autoritetet e Qendrës së Shërbimeve të Arsimit. Çka do të thotë se nëse nuk paraqiteni për të dhënë provimin në orën që është përcaktuar për ju, do të përjashtoheni nga gara për vendet e lira të punës.

Për të mos rrezikuar përjashtimin, kandidati duhet të paraqitet pranë QSHA-së 30 minuta përpara orarit të publikuar, teksa duhet të jetë i pajisur me letërnjoftim (Kartë ID ose Pasaportë, dokumenti origjinal dhe një kopje të tyre, si dhe faturën origjinale të pagesës (me vulën e bankës përkatëse) së tarifës së provimit. Tarifa që duhet të shlyeni pranë bankave për dhënien e këtij provimi është në vlerën e 3,000 lekëve. Kandidatët, të cilët nuk paraqesin dokumentet e mësipërme, nuk mund të marrin pjesë në provim.

Gjatë zhvillimit të provimit ndalohet mbajtja dhe përdorimi i celularëve apo mjeteve të tjera të komunikimit, pasi kjo vlerësohet si kriter mos kualifikimi, ndalohet komunikimi me kandidatët e tjerë gjatë zhvillimit të provimit deri në marrjen e deklaratës së rezultatit, ndalohet lëvizja përtej vendit të përcaktuar për zhvillimin e provimit, ndalohet duhani dhe konsumimi i ushqimit në mjediset e provimit, firmos procesverbalin e pjesëmarrjes dhe rezultatit të marrë.

Testi i punësimit

Testi që do të duhet të plotësojë çdo kandidat përbëhet nga dy pjesë. Pjesa e parë përmban pyetje rreth akteve ligjore që rregullojnë kujdesin shëndetësor dhe profesionin e infermierit në Republikën e Shqipërisë dhe çështje që lidhen me etikën dhe komunikimin profesional në infermieri, si dhe në profilet e tjera të shkencave mjekësore teknike. Ndërsa pjesa e dytë përmban pyetje rreth kujdesit infermieror bazë  dhe në specialitet, e cila do të ketë edhe numrin më të madh të pyetjeve, po ashtu edhe të pikëve që do të sigurojë secili kandidat.

Vlerësimi final i çdo kandidati

Vlerësimi i çdo kandidati përfshin pikët e fituara në fazën e parë të konkurrimit me dosje, si dhe pikët e siguruara nga testimi i informatizuar. Sipas skemës së përcaktuar më herët, vlerësimi i dosjes së kandidatëve konsiston në vlerësimin e arsimimit, të përvojës e të trajnimeve, të lidhura me fushën e studimit të kryer dhe punës në këtë profil. Në këtë fazë ju mund të grumbulloni deri në 30 pikë. Ndërsa në fazën e dytë “Testimi i informatizuar” kandidati do të mund të sigurojë deri në 70 pikë në total (i cili përbëhet nga pikët e pjesës së parë të testit 20 pikë, si dhe nga pikët e pjesës së dytë të testit 50 pikë. Pas mbledhjes së këtyre pikëve, kandidatët që kanë nivelin më të lartë të pikëve do të ftohen të parët për të zgjedhur vendet e punës sipas preferencave.

Prej afro katër vitesh procesi i punësimit për profesionistët e shkencave mjekësore teknike të profileve të përmendura më lart, por edhe të mjekëve në spitale, poliklinika e qendra shëndetësore, bëhet vetëm nëpërmjet konkurrimeve që zhvillohen në portalin online “Infermier për Shqipërinë”, ku të gjithë të pajisurit me lejen e ushtrimit të profesionit në këto profile mund të konkurrojnë në dy fazat e përcaktuara (aplikimi me dosje dhe faza e dytë që është testimi i informatizuar që zhvillohet në Qendrën e Shërbimeve të Arsimit). Kandidatët që sigurojnë pikët më të larta nga këto dy faza sigurojnë edhe vendet e lira të punës në këto struktura.

Në ditën e provimit

• Kandidati duhet të paraqitet pranë QSHA-së 30 minuta përpara orarit të publikuar.
• Duhet të jeni të pajisur me: Letërnjoftim (Kartë ID ose Pasaportë, dokumenti origjinal).
• Kopje të Kartës ID ose Pasaportë.
• Faturën origjinale të pagesës (me vulën e bankës përkatëse) së tarifës së provimit për llogari.

Gjatë zhvillimit të provimit:

• Ndalohet mbajtja dhe përdorimi i celularëve apo mjeteve të tjera të komunikimit gjatë zhvillimit të provimit, pasi kjo vlerësohet si kriter mos kualifikimi.
• Ndalohet komunikimi me kandidatët e tjerë gjatë zhvillimit të provimit deri në marrjen e deklaratës së rezultatit.
• Ndalohet lëvizja përtej vendit të përcaktuar për zhvillimin e provimit.
• Ndalohet duhani dhe konsumimi i ushqimit në mjediset e provimit

Datat e testimit