Situata duket më e qetë këtë të martë në fushën e mbetjeve të qytetit të Vlorës, por vatra të vogla zjarri vazhdojnë të djegin plehrat dhe shkaktojnë ndotje në kulmin e sezonit turistik.
Kryebashkiaku i ri, Ermal Dredha, thotë se nuk dihet me saktësi nëse zjarri ka qenë i qëllimshëm, ndaj sqaron se po bashkëpunohet me policinë dhe Prokurorinë që kane nisur një hetim penal.
Prej tre ditësh vijohet të punohet për shuarjen e flakëve jo vetëm nga mjetet e bashkisë, por dhe ato të emergjencave civile. Një helikopter i Ministrisë së Mbrojtjes vazhdon të hedhë ujë.
Kryebashkiaku Dredha thotë se për të mos u përsëritur ngjarje të tilla, kërkohet një zgjidhje afatgjatë për menaxhimin e mbetjeve.
Zjarri nisi të shtunën, por pasditen e të dielës flakët në venddepozitimin e mbetjeve në qytetin bregdetar morën përmasa të pamenaxhueshme, edhe ndërhyrja e helikopterit të ushtrisë Cougar nuk e ndryshoi dot situatën. Qyteti ende pas tre ditësh vijon të jetë i mbuluar nga tymi.
