Si çdo fundjavë, banorët e Bërxullës kanë dalë përsëri në rrugë për të protestuar, për shkak të dëmshpërblimeve të ulëta që u janë ofruar nga shteti, si kompensim për tokat ku do kalojë rruga e re Thumanë-Kashar. Këtë herë, bashkë me të rriturit ishin edhe fëmijët e mitur, ku një pjesë kishin sfiduar edhe veten për shkak të agjërimit. “Kam dalë në protestë për gjyshin dhe gjyshen. Unë sot po agjëroj”, tha Bianka, një prej fëmijëve të mitur.
“Kam ardhur për të mbështetur gjyshërit e mi në protestë. Agjëroj këtë vit dhe do ta mbaj gjatë gjithë kohës. Është pak e vështirë se gjithë kjo vapë këtu dhe gjithë këta njerëz është një trysni shumë e madhe. Ne lutemi dhe për këtë gjë dhe shpresojmë të marrim mirë kuptim nga shteti”, tha një tjetër fëmjë.
6 muaj nga protestat e Bërxullës po bëhen tashmë dhe ende çështja e shpronësimeve për ndërtimin e autostradës Thumanë-Kashar nuk ka marr zgjidhje. Një prej banorëve me vete mbante një shishe benzine nga ku kërcënoi se në vijim do të vetëflijohej. Burra, gra e fëmijë bllokuan sërish rrugën kryesore të Rinasit dhe janë ulur në rrugë duke kërkuar zgjidhje. Policisë edhe këtë herë iu desh të konfrontohej me ta, me qëllim zhbllokimin e aksit.
“Turp e faqja e zezë. Jo të dal në rrugë, por përditë, kjo rrugë do të pezullohet derisa shteti shqiptar të vijë të na japë zgjidhje. Ku do shkojnë banorët, këtu është masakër e vërtetë. Gjithë fshati është masakruar. E kanë bërë rrugën duke e parë në Google. Pse ashtu shihet rruga, nga zyrat? Turp të kenë. Çfarë qeveritarësh kemi. Me votat e popullit ka ardhur në pushtet Edi Rama. Është bërë më keq se Sali Berisha. E ka shtypur në atë mënyrë se s’kanë bukë për të ngrënë. Bëhen 6 muaj dhe nuk vjen njeri të ballafaquar. Nuk ka ardhur njeri këtu. Luftë do kenë”, thanë banorët.
Banorët kanë lajmëruar të hënën (sot) një tjetër protestë, ku pritet të ketë përshkallëzime të saj. Veprimet që po bëhen ndaj tyre i cilësojnë si masakër të vërtetë, ndërsa paralajmërojnë ‘luftë’ me qeverinë në rast se nuk i japin zgjidhje. Sipas tyre, kompania “Gener2”, që ka fituar projektin me koncesion për 35 vite, në kundërshtim me ligjin, ka nisur punën në terren pa pasur një leje ndërtimi.
