A keni puthur ndonjëherë dikë që e keni dashur vërtet, por e keni ndjerë, automatikisht, se ky mashkull/femër nuk është për ju? Tërheqja romantike që ndiejmë për dikë buron nga faktorë po aq thelbësorë sa mikrobioma e një personi, d.m.th. popullata e mikrobeve të dobishme që jeton në trupin e tyre dhe që është e ndryshme për secilin prej nesh.
Sipas studimeve, një mënyrë pothuajse instinktive për të ditur nëse dikush na pëlqen është të tërhiqemi nga aroma e tyre, e cila përcaktohet edhe nga mikrobioma e tyre. Kjo do të thotë, nëse përputhemi. Pra, nëse jeni ende beqarë, nuk jeni ju, por mikrobet që jetojnë në trupin tuaj, sipas mikrobiologut Jason Tetro në Yourtango.com :
- A ndikojnë mikrobet vetëm në shqisën tonë të nuhatjes apo edhe tek shqisat e tjera?
Stimulimi i parë është aroma, por ato gjithashtu ndikojnë në shije, për shembull, umami prodhohet kryesisht nga bakteret si lactobacillus.
- A mund ta ndryshojmë mikrobiomën tonë? Dhe nëse po, si?
Mikrobioma jonë formohet nga faktorë të tillë si dieta dhe mënyra e jetesës. Marrja e antibiotikëve gjithashtu e ndryshon këtë, por jo për mirë. Probiotikët ndihmojnë në rivendosjen jo vetëm të mikrobiomës, por edhe të shëndetit tonë të përgjithshëm.
- A është e vërtetë që puthja e dikujt me një mikrobiomë të caktuar madje mund të na sëmurë?
Kjo është e vërtetë në shumë raste, pasi me çdo puthje të thellë transferohen rreth 80 milionë baktere nga njëra tek tjetra. Ka raste që jemi edhe alergjikë ndaj tyre, ndaj në vend të gëzimit dhe kënaqësisë mund të ndjejmë siklet, madje edhe neveri.
- A mund të dashurohemi me dikë por të humbasim interesin me kalimin e viteve nëse mikrobioma jonë ndryshon?
Sigurisht, kjo varet nga mënyra e jetesës së secilit prej nesh, për shembull dieta, ushtrimet dhe higjiena personale, të gjitha këto që ndikojnë në mikrobiomën tonë.
- A ka shenja të tjera që mikrobiomet tona nuk përputhen?
Studimet kanë treguar se transferimi i mikrobeve të dëmshme nga njëri tek tjetri mund të ketë edhe pasoja afatgjata si shtimi në peshë, depresioni dhe, ndoshta, shfaqja e alergjive, megjithëse kërkimet e lidhura janë ende në fillimet e tyre.
- A takojmë shpesh dikë me të cilin jemi të papajtueshëm, në aspektin mikrobiomik?
Kjo është më e zakonshmja, në fakt, pasi secili prej nesh kemi një mikrobiom unik dhe nuk është e lehtë të gjesh dikë që përputhemi në atë nivel.
j.l./ dita
