Punësimi i studentëve ekselentë, pas shpalljes u kualifikuan 271 kandidatë

Të paktën 271 studentë të ekselencës u kualifikuan për t’u punësuar përkohësisht në institucionet e administratës shtetërore këtë vit, pas shpalljes së bërë më herët të thirrjes nga ana e Departamentit të Administratës Publike.

Në listën e bërë publike nga DAP janë renditur kandidatët e kualifikuar sëbashku me pozicionet vakante ku potencialisht ata mund të punësohen sipas përzgjedhjes që bëjnë gjatë paraqitjes. Listimi i 271 kandidatëve është bërë sipas një sistemi pikëzimi duke u renditur nga kandidati me numrin më të lartë të pikëve tek ai me më të ulëta.

Studentët e ekselencës nisën të angazhohen në administratë pas një vendimi të miratuar nga qeveria në vitin 2019 i cili parashikon angazhim në institucione të studentëve në ciklin e parë ose të dytë të studimit të arsimit të lartë, me note mesatare 9 – 10 ose ekuivalent me të, në institucionet e huaja të arsimit të lartë, institucionet publike të arsimit të lartë apo institucionet/programet e akredituara jopublike të arsimit të lartë në Republikën e Shqipërisë, në varësi të diplomës së kërkuar për pozicionin e punës vakant ku aplikon.

Sipas vendimit institucionet e administratës shtetërore lidhin kontratat e përkohshme të punës me kandidatët, sipas listës së dërguar nga DAP-i, e cila respekton përputhshmërinë e nivelit dhe të fushës së studimit me kriterin e nivelit dhe të llojit të diplomës për pozicionin përkatës të punës. Marrëdhëniet e punës së kandidatëve, të cilët lidhin kontratat e punës për periudhën 1-vjeçare, rregullohen në bazë të dispozitave të Kodit të Punës.

Vendimi përcakton se në përfundim të kontratës 1-vjeçare, të lidhur sipas këtij vendimi, ata që dëshirojnë të bëhen pjesë e shërbimit civil do t’i nënshtrohen procedurave të konkurrimit, sipas legjislacionit të shërbimit civil.

Raporti i Komisioneri për Mbikëqyrjen e Shërbimit Civil për vitin e shkuar raportoi se për rreth 4410 pozicione pune pjesë e sistemit të shërbimit civil në institucionet e administratës shtetërore (referuar të dhënave të raportuara për aparatin e Kryeministrisë, ministrive dhe 43 institucioneve të varësisë), në 500 prej tyre që përbëjnë 11.2% të numrit të përgjithshëm të pozicioneve në shërbimin civil të raportuara, janë punësuar studentë të ekselencës. Ky numër përbën totalin e studentëve për vitet 2019-2022. /Monitor

a.m/dita