Presidenti rus Vladimir Putin ka nënshkruar një strategji të re të politikës së jashtme për Rusinë që synon reduktimin e “dominimit” perëndimor dhe identifikimin e Kinës dhe Indisë si partnerë kryesorë për të ardhmen.
Dokumenti i ri çimenton përçarjen e thellë midis Rusisë dhe Perëndimit lidhur me ofensivën e Moskës në Ukrainë.
Dokumenti strategjik argumenton se “Federata Ruse synon t’i japë përparësi eliminimit të gjurmëve të dominimit të Shteteve të Bashkuara dhe vendeve të tjera armiqësore në politikën botërore”.
Termi “vende armiqësore” përdoret nga Rusia për t’iu referuar atyre vendeve, veçanërisht në Evropë dhe Amerikën e Veriut, të cilat kanë dënuar fushatën ushtarake të Moskës në Ukrainë dhe kanë miratuar sanksione kundër Federatës Ruse.
Dokumenti prej 42 faqesh, i cili u postua në faqen e internetit të Kremlinit, thoshte se Rusia do të synojë “të krijojë kushtet për çdo shtet që të refuzojë qëllimet neokolonialiste dhe hegjemoniste”.
Duke shpallur dokumentin në një takim të Këshillit të Sigurimit, Putin tha se nevojiteshin përditësime të strategjisë së angazhimit të Rusisë në skenën globale për shkak të “ndryshimeve radikale” në botë.
Rusia i identifikoi lidhjet me Kinën dhe Indinë si thelbësore dhe theksoi rëndësinë e “thellimit të lidhjeve dhe koordinimit me qendrat sovrane dhe miqësore të fuqisë dhe zhvillimit global të vendosura në kontinentin Euroaziatik”.
Dokumenti përshkruan gjithashtu Rusinë si një “qytetërim shtetëror” të ngarkuar me mbrojtjen e asaj që ajo e quan një “botë ruse” të kulturave të lidhura në kontinentin Euroaziatik.
Koncepti i “botës ruse” përdoret nga Kremlini për të justifikuar veprimet e tij në Ukrainë nën pretendimin e mbrojtjes së pakicës rusisht-folëse të vendit.
j.l./ dita
