Këshilli i Ministrave vendosi të mërkurën që të ndryshojë emërtimin e Agjencisë Kombëtare e Ujësjellës- Kanalizimeve dhe Infrastrukturës së Mbetjeve (AKUM), duke i hequr kësaj agjensie kompetencat për mbetjet dhe kontratat koncesionare të inceneratorëve.
Vendimi i propozuar nga zv/kryeministrja dhe ministrja e Infrastrukturës, Belinda Balluku, parashikon rikthimin në emërtimin e vjetër AKUK [Agjencisë Kombëtare e Ujësjellës- Kanalizimeve] dhe heqjen e përgjegjësisë për planifikimin territorial dhe infrastrukturën e mbetjeve.
Agjencia është në varësi të Ministrisë së Infrastrukturës dhe Energjisë dhe prej 5 vitesh ka pasur në përgjegjësi planifikimin territorial dhe infrastrukturën e mbetjeve, duke u bërë edhe autoritet përgjegjës për kontratat koncensionare të inceneratorëve.
Këtë agjenci e ka drejtuar ish-deputeti i PS-së, Alqi Bllako, i shpallur fajtor nga gjykata dhe i dënuar me 2.8 vjet burg për akuzën e shpërdorimit të detyrës në çështjen e inceneratorit të Fierit. Në procesin gjyqësor paralel për inceneratorin e Elbasanit, Bllako u shpall i pafajshëm.
Sipas VKM-së së vitit 2018, AKUM ishte institucioni përgjegjës për zbatimin e masterplanit kombëtar të mbetjeve për sa i përket planifikimit territorial dhe infrastrukturës së mbetjeve urbane dhe kishte kompetenca të përbashkëta me njësitë e qeverisjes vendore në menaxhimin e infrastrukturës së mbetjeve.
Asokohe, kompetencat e Agjencisë u zgjeruan edhe në fushën e planifikimit territorial dhe të infrastrukturës së mbetjeve, qendrat e transferimit, investimet në impiantet e incenerimit si dhe rehabilitimin e venddepozitimeve ekzistuese të mbetjeve urbane.
p.c. / dita
