Kryeministri Edi Rama ka konfirmuar dy përjashtimet nga Partia Socialiste, duke iu referuar avokatit të Erion Veliajt Plarent Ndreca dhe Elisa Spiropalit dhe një tjetër personi, të cilët i cilësoi si “të përjashtuarit e ditëve të fundit nga kjo shtëpi”.
Deklarata u bë gjatë mbledhjes së Asamblesë së PS-së në Tiranë, ku Rama kritikoi ashpër edhe mënyrën e menaxhimit të administratës së Bashkisë së Tiranës.
Rama ngriti gjithashtu shqetësimin për largimet nga puna në administratën bashkiake, duke kritikuar vendime që, sipas tij lidhen me mungesën e mbështetjes për qëndrimet publike të Veliajt apo të avokatit të tij.
Kryeministri përmendi rastin e Elona Lalajt, duke kundërshtuar largimin e saj dhe të punonjësve të tjerë për arsye që ai i konsideron arbitrare.
Ai paralajmëroi se Partia Socialiste nuk do të tolerojë drejtues apo punonjës të Bashkisë së Tiranës që zbatojnë vendime të tilla, pavarësisht përkatësisë së tyre politike.
Rama iu drejtua edhe vetë Veliajt, duke deklaruar se nuk mund ta gjykojë për qëndrimet dhe veprimet e tij, por shprehu shpresën që kryebashkiaku të kuptojë se, sipas tij po gabon në raport me kryeministrin dhe Partinë Socialiste.
“Si mund të largohet nga puna arbitrarisht një grua që e ka mbajtur me dinjitet uniformën e kryepolicit bashkiak, dhe të tjerë drejtues e punonjës të bashkisë së Tiranës pse nuk u bëjnë like dhe share dorëshkrimeve të Lalit, nga burgu imagjinar politik apo pse nuk gëzojnë mbështetjen e avokatit të tij. Ky i fundit i adresohet shkresërisht Bashkisë së Tiranës, duke firmosur si drejtues politik, ndërkohë që është thjesht një nga 2 të përjashtuarit e ditëve të fundit nga kjo shtëpi. NUk do të tolerohet më askush që flet dhe sillet me detyrat ndaj popullit dhe kësaj familje si e ëma e Zeqos në majë të thanës. E përsëris, nuk e gjykoj dot Erionin për çfarë ai thotë dhe bën, por uroj me gjithë zemër që të kuptojë që është në gabim ditë e natë në raport me mua dhe PS-në. Por ne do ta gjykojmë me ashpërsinë më të madhe politike këdo në Bashkinë e Tiranës që do të zbatojë këtë kuturisje qorre kundër njerëzve të bashkisë, qofshin anëtarë të kësaj familje, qofshin shërbëtorë politikë pa parti si Elona Lalaj, apo qofshin edhe qytetarë demokratë që punojnë në radhët e mijëra njerëzve në Bashkinë e Tiranës. E dimë të gjithë që mungesa e kryebashkiakut është një problem shumëplanësh për eurinë e punëve. Këtë do ta zgjidhim në 9 maj me fitoren në ditën e madhe të Europës“, tha Rama.
j.l./ dita
