E premtja shënon dhe ditën e fundit të fushatës për zgjedhjet e së dielës në Himarë.
Kryeministri Edi Rama iu premtoi himarjotëve se shumë shpejt do të zgjidhet çështja e pronave.
“Në Kadastër ka filluar digjitalizimi për Himarën. Pra besoj që pas tetorit do të fillojmë pak nga pak edhe procesin tjetër edhe gjithçka do të shkojë në vendin e duhur”, tha Rama.
Në krah të kandidatit socialist Vangjel Tavo, kryeministri Edi Rama i krahasoi himarjotët me baskët në Spanjë.
“Po diskutonim gjithë historinë, çfarë janë himarjotët dhe si i kanë pasur marrëdhëniet qoftë me Tiranën, qoftë me Athinën. Dhe në fund fare konkluzioni është po ai, janë himarjotë, janë si korsikanët, janë si baskët, janë komplet gjë tjetër”, tha Rama.
Duke folur për zgjedhjet në Himarë, Rama u shpreh se tashmë rezultati ishte i ditur, duke iu referuar sondazheve, të cilat sipas tij tregojnë një mbështetje të madhe për kandidatin e PS, Vangjel Tavo.
Kryeministri shtoi se partia që drejton nuk vjedh vota por lufton me të gjitha strukturat partiake për të arritur fitoren.
“Kur del ai (Gjiknuri) thotë që do të bëhet tërmet, kur del ky tjetri këtu (Blendi Klosi) dhe thotë do bëhet breshër, kur dal unë dhe them shifra, këta kujtojnë se ne kemi ndarë lekët dhe kemi blerë votat. Kjo është një çmenduri. Ne ndërkohë kemi sistemin që e dimë paraprakisht rezultatin, për shkak të kontakteve dhe sondazheve.
Ne kemi bërë sondazhe, i kemi bërë në fillim, kur u vendos Vangjeli, i kemi bërë para një jave dhe ne e dimë pak a shumë se si do të dalë rezultati.
Makineria jonë elektorale është një makineri moderne, partia jonë është organizim, koordinim, kemi shumë potencial për të marrë më shumë. Prandaj them që vitin e ardhshëm objektivi është për të marrë rezultatin më spektakolare të të gjithë këtyre 9 fitoreve radhazi”, tha Rama.
i.b./dita
