Shqipëria i tejkalon normat e vendosura nga Bashkimi Europian përsa i përket ndotjes akustike në vend. 55 decibel ditën është vlera më e lartë për të gjitha qytetet e vendit, e regjistruar në Raportin e Gjendjes së Mjedisit, ku theksohet se kemi një tejkalim të normës.
Niveli më i lartë i zhurmave është vlerësuar në stacionet e Tiranës 17.88%, ku kemi tejkalim të normës. Zona e ish-bllokut renditet si më problematikja në kryeqytet, ku ndotja akustike mbetet po aq problematike, për shkak të muzikës së lartë në lokalet e shumta që frekuentohen kryesisht nga grupmoshat e reja.
Vetëm qyteti i Kukësit nuk përfshihet në këto nivele duke mos u renditur si nëj ndër qytetet me zhurma. Kryesisht zonat me zhurmën më të lartë regjistrohen në qytetet e mëdha por dhe në zona turistike sidomos gjatë sezonit veror.
KLSH në auditimin e performancës “Ndotja akustike”, i vitit 2019, konkludon se masat e marra nga Ministria e Turizmit dhe Mjedisit, Ministria e Shëndetësisë dhe Mbrojtjes Sociale, si dhe Bashkia Tiranë për menaxhimin e zhurmave mjedisore në vendin tonë nuk kanë qenë efektive.
Ndërkohë referuar raportit mushkëri të gjelbra për qytetet tona, 2021, nga Co-plan, rezulton se mbi gjysmë milion qytetarë të Republikës së Shqipërisë operojnë çdo ditë nën ekspozimin dhe ndikimet e zhurmave dhe ndotësve të ajrit.
Ministri e Turizmit dhe Mjedisit ka kaluar në Kuvend projektligjin i cili pritet të sjellë efektivitet për uljen e zhurmave. Kosto që pritet të sjellë projektligji për zhurmat janë 48.8 milionë për blerjen e pajisjeve që masin zhurmën për çdo bashki, kostot operacionale të monitorimit dhe të vlerësimit të zhurmës, si dhe inspektimet në terren.
Këto kosto do të mbulohen nga të ardhurat për buxhetin e shtetit, që vijnë nga shpenzimet që kryejnë vizitorët e huaj në Shqipëri dhe vjelja e gjobave nga vendosja e sanksioneve administrative nga policia bashkiake.
m.b./dita
