Vjedhjet janë tashmë një fenomen serioz i shoqërisë shqiptare. Një raport i Prokurorisë së përgjithshme dorëzuar në Kuvend, dëshmon se 62% e atyre që janë përfshirë në një vepër penale gjatë vitit 2024, ishin pikërisht hajdutëri, kryesisht raste të vjedhjeve banale të sendeve me vlerë të ulët.
Pesha e krimeve në fushën e lëndëve narkotike është vetëm 10% e totalit. Pjesë e 5 veprave penale dominuese është edhe shkatërrimi i pronës, kryesisht me lëndë plasëse, cenimi i rendit dhe krimi kibernetik.
Prokurorët e rretheve kanë përgjuar 2361 telefona, me qëllim hetimet për krimet kundër personit, lëndët narkotike dhe vjedhjet e mashtrimet. Qytetet me koefiçentin më të lartë të kriminalitetit, janë Saranda, Vlora e Gjirokastra. Kurse zonat më të qeta e të pastra nga fijet e krimit gjatë 2024-ës ishin Dibra dhe Berati.
Prokuroria e Përgjithshme ka analizuar edhe tendencat e krimit, ku ka nënvizuar se ka një rënie të rasteve të drogës. Nga ana tjetër janë rritur krimet kundër jetës, dhe falsifikimi i monedhave e pastrimi i parave.
Të varfrit, më pak të arsimuarit dhe gjinia mashkullore janë sipas raportit më të përfshirët në vepra penale.
