Të gjithë ata të rinj që dëshirojnë të vijojnë shkollën e lartë, por për arsye të ndryshme nuk janë regjistruar në një prej degëve të zgjedhura kanë mundësi të mos mbeten jashtë dyerve të universitetit.
Ministria e Arsimit ka ndryshuar udhëzimin për procedurat e aplikimit dhe regjistrimit në institucionet e arsimit të lartë të vitit 2019.
Ka shtuar një tjetër raund dhe i ka dhënë maturantëve një tjetër mundësi studimi. Kandidatët për studentë mund të regjistrohen në ato programe ku ka vende të lira pas raundit të tretë. Të rinjtë duhet të plotësojnë dy kushte, të jenë të pranishëm në portalin U–Albania dhe të mos rezultojnë të regjistruar në asnjë degë.
Në vendimin e fundit të qershorit që mban firmën e ministres së Arsimit Evis Kushi thuhet:
“Pas përfundimit të raundit të tretë, kandidatët që janë pjesë e portalit U-albania dhe rezultojnë të paregjistruar në asnjë program studimi, kanë të drejtën e regjistrimit në programe studimi ku ka kuota të paplotësuara në të gjitha IAL-të, pavarësisht aplikimeve në raundet e mëparshme, brenda dy ditëve pune nga data e përfundimit të raundit të tretë”
Ndërkohë për të mos penalizuar të rinjtë e regjistruar në ato degë që këtë vit për shkak të interesit të ulët të studentëve mund të mbyllen Ministria e Arsimit ka gjetur këtë zgjidhje.
“Studentët, të cilët pas përfundimit të raundit të tretë rezultojnë të regjistruar në një program studimi ku nuk plotësohet numri minimal i parashikuar në aktet e brendshme të IAL-ve për aktivizimin e programit, brenda 30 ditëve, me vendim senati akademik, bëhet kalimi në program studimi të përzgjedhur prej studentit, ku ka kuota të paplotësuara. Vendimi i njoftohet ministrisë përgjegjëse për arsimin dhe QSHA-së për të vijuar procedurën e regjistrimit dhe matrikulimit”.
Këtë vit aplikuan për të ndjekur studimet brenda vendit rreth 21 mijë maturantë. Ata kanë mundësi të regjistrohen në një prej rreth 600 degëve në universitetet publike dhe private duke filluar nga dy shtatori.
a.m/dita
