Rinas, porta e pasigurisë

Nga Arbër Sheholli

Nga shqetësimi për rendin publik, te kriza strukturore e shtetit: një polici që jo vetëm dështon të parandalojë krimin, por në disa raste bashkëjeton me të.

Vrasja e djeshme në zonën e Rinasit është më shumë se një ngjarje kriminale. Është një skenë që ekspozon publikisht se sa i brishtë është rendi, por edhe sa thellë ka depërtuar krimi në shtetin shqiptar.

E para, krimi i rëndë nuk ndodhi në ndonjë rrugicë periferike, por në portën hyrëse të vendit, aty ku çdo ditë kalojnë diplomatët, turistët dhe mijëra qytetarë që e marrin Rinasin si simbol të sigurisë dhe rregullit.

Kur një vrasje ndodh në një nga pikat më të ruajtura të vendit, problemi nuk është thjesht kriminal. Këtë ndjesi e shton një detaj i përsëritur: Në makinën ku ndodhej viktima (një person i njohur për lidhjet me botën e krimit) ishte edhe një punonjës në proces i Agjencisë së Mbikëqyrjes së Policisë.

Ky institucion teorikisht ekziston për të kontrolluar policinë dhe për të luftuar korrupsionin e saj.

Kjo është goditje e rëndë për imazhin e kujtdo që pretendon të ketë reformuar sistemin e sigurisë. Nëse edhe organet që duhet të garantojnë integritetin e policisë bëhen shoqërues të botës së krimit, atëherë deklaratat për rendin dhe sigurinë bëhen thjesht një fasadë e zbrazët.

Rinas bëhet kështu, edhe njëherë, simbol i dështimit të politikës së rendit: një hapësirë që duhet të përfaqësonte shtetin në formën e tij më të disiplinuar, kthehet në pasqyrë të dobësisë së autoritetit.

Policinë e shohim shumë të zellshme dhe skenike ndaj makinave me xhama të zinj, apo cepave në lagje ku gjëmojnë cigare hashashi, por në përballjen me rrjetet e organizuara, me armët dhe paratë e krimit, nuk shohim të njëjtën kurajo.

Kjo është një krizë e sigurisë, një kalbëzim i brendshëm i sistemit. Policia nuk arrin të mbrojë realisht qytetarin sepse një pjesë e saj është bërë peng i krimit. Është momenti për të kuptuar se reforma në polici nuk matet me fjalë, me uniforma të bukura apo me patrulla që shfaqen gjithandej nëpër qytete e rrugë, por së pari me aftësinë për të pastruar veten nga brenda.

—-

©️Copyright Gazeta DITA

Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016