Futbollistët e vegjël të Tiranës kanë përfunduar një program trajnimi nga ekspertët e ekipit të njohur italian të futbollit, Roma. Teksa mori pjesë në ceremoninë e shpërndarjes së certifikatave në fund të këtij programi Erion Veliaj tha se bashkëpunimi i shkëlqyer mes Tiranës dhe Romës po reflektohet edhe në aktivitetet sportive.
“Për ne ka qenë një privilegj i jashtëzakonshëm bashkëpunimi me Romën. Ne kemi një traditë bashkëpunimi me qytetin në nivel kryetarësh bashkish. Që kur ka mbaruar finalja dhe Roma u shpall kampione, Tirana është bërë një lloj “Meke” e vogël për të gjithë romanët, sepse duan të vijnë në Tiranë, në qytetin ku u thye mallkimi 60 e ca vjeçar, për të parë stadiumin, pastaj kthehen në vizitorë që përsërisin vizitat e tyre, kalojnë kohë, shpenzojnë, dhe fakti që sot prej këtij bashkëpunimi sportiv, të dyja qytetet janë afruar, është diçka e mrekullueshme”.
Kreu i Bashkisë bëri edhe një apel për prindërit që të regjistrojnë fëmijët e tyre në sport.
“Një nga arsyet pse ne insistojmë kaq shumë, nuk është detyrimisht te çmimet dhe trofetë, sesa te fakti që duke luajtur në skuadër mëson që jeta ka fitore, ka edhe humbje. Doja të ftoja edhe prindërit e tjerë, ndoshta jo të gjithë ndajnë pasionin tuaj, që edhe në një ditë të diel, ditë Pashke, jeni këtu. Një apel të gjithë prindërve: këtë vit që jemi Qyteti Europian i Sportit 2023, duam ta përdorim si motivim për të regjistruar sa më shumë fëmijë në aktivitete sportive”.
Veliaj tha se viti 2023 është një mundësi për të patur sa më shumë të rinj në aktivitet fizik.
m.b./dita
