SHBA dhe Koreja e Jugut kanë siguruar një marrëveshje historike për të kundërshtuar kërcënimin bërthamor të Koresë së Veriut. Uashingtoni ka rënë dakord të vendosë periodikisht nëndetëset amerikane të armatosura bërthamore në Korenë e Jugut dhe të përfshijë Seulin në operacionet e tij të planifikimit bërthamor.
Në këmbim, Koreja e Jugut ka rënë dakord të mos zhvillojë armët e veta bërthamore. Deklarata e Uashingtonit do të forcojë bashkëpunimin e aleatëve në parandalimin e një sulmi të Koresë së Veriut, tha Presidenti i SHBA Joe Biden.
Shqetësimi është rritur nga të dyja palët për kërcënimin bërthamor të paraqitur nga Koreja e Veriut, pasi vendi po zhvillon armë taktike bërthamore që mund të synojnë Korenë e Jugut dhe po përpunon armët e tij me rreze të gjatë që mund të arrijnë në territorin e SHBA-së.
Shtetet e Bashkuara tashmë kanë një detyrim traktati për të mbrojtur Korenë e Jugut dhe më parë janë zotuar të përdorin armë bërthamore nëse është e nevojshme.
Presidenti i Koresë së Jugut, Yoon Suk-yeol, i cili ishte në Shtëpinë e Bardhë për një vizitë shtetërore, tha se Deklarata e Uashingtonit shënoi një angazhim “të pashembullt” të SHBA-së për të përmirësuar mbrojtjen, për të penguar sulmet dhe për të mbrojtur aleatët amerikanë duke përdorur armë bërthamore.
Sipas marrëveshjes së re, SHBA-ja do t’i bëjë më të dukshme angazhimet e saj të mbrojtjes duke dërguar një nëndetëse të armatosur me armë bërthamore në Korenë e Jugut për herë të parë në 40 vjet, së bashku me asete të tjera strategjike, duke përfshirë bombarduesit me aftësi bërthamore.
Të dy palët do të zhvillojnë gjithashtu një grup konsultativ bërthamor për të diskutuar çështjet e planifikimit bërthamor.
Politikanët në Seul kanë kohë që e kanë kërkuar nga Uashingtoni që t’i përfshijë ata më shumë në planifikimin se si dhe kur të përdorin armët bërthamore kundër Koresë së Veriut. \BBC\
p.k\dita
