Një bombë ajrore ruse ka goditur një qendër transfuzioni gjaku në Ukrainën verilindore, duke vrarë dhe plagosur njerëz, ka thënë presidenti ukrainas, Volodymyr Zelensky.
Ai bëri me dije se ekipet e shpëtimit tani po përpiqeshin të vinin nën kontroll një zjarr, pas goditjes në komunitetin Kupiansk në rajonin e Kharkiv të shtunën mbrëma.
“Mundja e terroristëve është një çështje nderi për këdo që vlerëson jetën,” shtoi ai.
Në një postim në mediat sociale, Zelensky i përshkroi autorët si “bisha” që po kërkonin “të shkatërronin gjithçka që thjesht lejon të jetoni”.
“Ky krim lufte vetëm thotë gjithçka për agresionin rus,” nënvizoi ai, teksa nuk tha se sa njerëz u vranë dhe sa u plagosën në sulm.
Rusia nga ana tjetër ka mohuar më parë të gjitha akuzat për krime lufte ose shënjestrim të civilëve.
Qyteti i Kupiansk dhe vendbanimet aty pranë u pushtuan nga trupat ruse në ditët e para të pushtimit në shkallë të plotë të Ukrainës nga Moska, i nisur në shkurt 2022.
Zona u çlirua gjatë një kundërofensive ukrainase shtatorin e kaluar.
Presidenti Zelensky tha gjithashtu se të shtunën, Rusia kreu veçmas një sulm raketor, duke synuar një kompani aeronautike të drejtuar nga grupi Motor Sich në rajonin perëndimor Khmelnytskyi.
Sulmet ruse vijnë pasi Moska akuzoi Ukrainën se goditi një cisternë ruse me 11 anëtarë të ekuipazhit në Detin e Zi – sulmi i dytë i tillë me dron në det në po aq ditë.
Zyrtarët rusë detarë thanë se dhoma e motorit të cisternës Sig u dëmtua në sulmin në ngushticën e Kerçit. Askush nuk u lëndua.
