Kupa e Botës FIFA 2026 do të jetë historike jo vetëm për formatin e saj të ri me 48 ekipe dhe organizimin e përbashkët të Shteteve të Bashkuara, Kanadasë dhe Meksikës, por edhe për shkallën e çmimeve në dispozicion.
Këshilli i FIFA-s, i mbledhur në Doha në prag të finales së Kupës Ndërkontinentale, miratoi një fond çmimesh të paprecedentë, i cili do të ripërcaktojë ndikimin ekonomik të Kupës së Botës në futbollin global.
Përpara turneut, FIFA ka miratuar një kontribut financiar total prej 727 milionë dollarësh, i cili do të shpërndahet në lidhje me Kupën e Botës.
Shqipëria, ashtu si edhe Kosova, nuk janë kualifikuar ende për këtë Kupë Bote, por kanë shansin e fundit nëpërmjet play-off-it.
Dhe, nëse kuqezinjtë dhe “dardanët” arrijnë kualifikimin historik në Botëror, dihet se sa do të jenë shumat që do të përfitojnë.
Çdo ekip nga 48-të finalistët e Kupës së Botës do të përfitojë minimalisht 9 milionë dollarë. Kësaj shume i shtohen edhe 1.5 milionë dollarë për të mbuluar kostot e përgatitjes.
Kjo do të thotë që Shqipëria dhe Kosova do të kenë të garantuara të paktën 10.5 milionë dollarë vetëm për pjesëmarrjen në Kupën e Botës 2026.
Shuma do të rritet në varësi të vendit se ku përfundojnë ekipet:
Kampioni: 50 milionë dollarë;
Nënkampioni: 33 milionë dollarë;
Vendi i tretë: 29 milionë dollarë;
Vendi i katërt: 27 milionë dollarë;
Vendi 5-8: 19 milionë dollarë;
Vendi i 9-16: 15 milionë dollarë;
Vendi 17-32: 11 milionë dollarë;
Vendi 33-48: 9 milionë dollarë.
j.l./ dita
