Studimet kanë treguar se personat me nivele të ulëta të vitaminës D janë më të rrezikuar për t’u prekur nga diabeti i tipit 2 (intolerancë e dëmtuar e glukozës), kjo për faktin se absorbimi i kalciumit ndihmon për të menaxhuar sheqerin në gjak.
Mangësitë e vitaminës D çojnë edhe në rritjen e rrezikut për obezitet, pasi kalciumi dhe vitamina D veprojnë si frenues të oreksit.
Por ajo që është mjaft e rëndësishme dhe pothuaj e njohur nga të gjithë është roli që ka vitamina D në thithjen e kalciumit dhe të fosforit duke siguruar kështu fortësinë e duhur kockore. Mangësia e vitaminës D mund të çojë në ulje të densitetit kockor dhe rrjedhimisht duke rritur shanset për thyerje të kockave. Mangësia e saj tek të vegjlit mund të shkaktojë rakitizmin, si edhe tek të rriturit një gjendje tjetër që quhet osteomalacia. Simptomat në këto raste mund të përfshijnë dobësi të përgjithshme apo dhimbje të kockave. Në lidhje me depresionin, vitamina D në vetvete nuk mund ta shmangë atë, por pacientët të cilët janë duke marrë ilaçe kundër depresionit së bashku me vitaminën D mund të ndihmohen në drejtim të zbutjes së shenjave të depresionit.
Mënyra më e lehtë për përfitimin e saj është ekspozimi i lëkurës ndaj rrezeve direkte të diellit, veçanërisht rrezeve ultravjollcë B (UVB). Sa më shumë të ekspozohemi, aq më shumë trupi ynë prodhon vitaminë D. Por kjo varet edhe nga lloji i lëkurës dhe koha e ditës kur ndodh ekspozimi. Sa më e errët lëkura, aq më shumë kohë duhet për t’u ekspozuar. Në përgjithësi ekspozimi ndaj Diellit është mënyra më e mirë për të marrë vitaminën D që i nevojitet trupit tonë pasi shumica e ushqimeve përmbajnë sasira të vogla të saj që nuk i përmbushin dot nevojat e organizmit.
Por jo të gjithë kanë mundësi t’i ekspozohen rregullisht diellit, qoftë për shkak të pozicionit gjeografik të vendeve ku jetojnë, apo qoftë edhe për shkak të angazhimeve personale të përditshme. Prandaj është e nevojshme që në ushqyerjen tonë të përditshme duhet të kemi patjetër produkte që përmbajnë sa më shumë këtë element të rëndësishëm jetësor. Të tilla mund të përmendim peshkun salmon, portokallet, qumështi, cerealet dhe vezët.
Në raste të caktuara lind nevoja për marrjen e shtojcave sintetike të vitaminës D për të plotësuar nevojat e organizmit. Është mjeku ai që përcakton sasinë e shtesave që duhet të merrni në çdo rast.
p.k\dita
