Presidentja e Kosovës, Vjosa Osmani nga Nju Jorku, ku ndodhet për Asamblenë e Përgjithshme të OKB-së, ka thënë se masat që janë vendosur ndaj Kosovës nuk i japin zgjidhje situatës, por janë më shumë në dëm të qytetarëve.
Siç bën me dije zyra e presidentes, këto diskutime u zhvilluan në takimin që kryediplomati europian Josep Borell mbajti me liderët e rajonit.
“Presidentja Osmani ka theksuar se masat e BE-së ndaj Kosovës përveçse nuk i kontribuojnë avancimit të dialogut, ato, nëpërmjet pezullimit të projekteve të BE-së, më së shumti prekin interesat dhe mirëqenien e qytetarëve”, thuhet në njoftimin e presidencës së Kosovës.
Po ashtu Osmani, i ka kërkuar Bashkimit Evropian që ta përshpejtojë procesin për ta bërë Kosovën me status të vendit kandidat për anëtarësim në Union.
“Presidentja Osmani shtroi nevojën e përshpejtimit të procesit dhe marrjen e vendimeve të nevojshme nga ana BE-së për integrimin e Kosovës, duke i dhënë statusin e vendit kandidat, si dhe anëtarësimin e shteteve të rajonit bazuar në përmbushjen e kritereve”, thuhet më tej në njoftim.
Kosova ka aplikuar për statusin kandidat në dhjetor të vitit të kaluar, ndërsa kusht është vendosur shtensionimi i situatës në veri të Kosovës dhe avancimi i procesit të dialogut për normalizimin e marrëdhënieve me Serbinë.
p.k\dita
