Për të 18-tën herë ka dështuar konstituimi i Kuvendi të Kosovës.
As në seancën e 18 nuk kaloi procesi i votimit për të formuar Komisionin Zgjedhor, ku do të mundësohej votimi në mënyrë të fshehtë për kandidaten për kryeparlamentare.
Me 52 vota për, një kundër dhe asnjë abstenim nuk kaloi procesi për formimin e këtij Komisioni. Kryesuesi i Seancës Konstitutive, Avni Dehari ka ndërprerë sërish seancën e Kuvendit duke njoftuar se do të mbahet më datë 21 maji në orën 10:30.
PDK, LDK, AAK kanë deklaruar se nuk do ta votojnë Haxhiun për këtë pozitë. Ndërsa, LVV ka deklaruar se nuk do ta ndërrojë kandidaten e tyre.
Kryetari i PDK-së, Memli Krasniqi tha se edhe sot u pa se LVV dëshiron të vazhdojë agoninë e themelimit të institucioneve.
Ai tha se deputetët mund të mblidhen çdo ditë për të provuar konstituimin e Kuvendit. Sipas tij kryetari i LVV-së, Albin Kurti s’ka interes që ta zhbllokojë situatën.
Krasniqi tha se shpreson që presidentja Vjosa Osmani do t’i drejtohet Gjykatës Kushtetuese me pyetje kushtetuese sesi duhet të veprohet.
Kryetari i LDK-së, Lumir Abdixhiku para mediave u shpreh se Kosova ka nevojë për institucione.
Sipas tij kjo situatë në të cilën ndodhet vendi është një lajm i keq për Kosovën.
Ai shtoi se është e pakuptimtë që LVV nuk po arrin të bëjë një shumicë minimale.
j.l./ dita
