Shtetet e Bashkuara të Amerikës dhe Mbretëria e Bashkuar pritet të njoftojnë një marrëveshje për uljen e tarifave. Qeveria e Mbretërisë së Bashkuar ka kërkuar një marrëveshje për të ulur tarifat që kur Presidenti Donald Trump i vendosi ato në pothuajse çdo vend në botë muajin e kaluar.
Presidenti Trump duket se “njoftoi” për marrëveshjen kur postoi në mediat sociale të mërkurën në mbrëmje: “Konferencë e madhe për shtyp nesër në mëngjes në orën 10:00 të mëngjesit, Zyra Ovale, në lidhje me një marrëveshje të madhe tregtare me përfaqësuesit e një vendi të madh dhe shumë të respektuar. E para nga shumë të tjera!!!”
Më 2 prill, Trump njoftoi tarifa të larta për dhjetëra partnerë tregtarë, përpara se të njoftonte një pauzë 90-ditore të taksave. Qeveritë nga e gjithë bota janë përpjekur të arrijnë marrëveshje me Uashingtonin përpara se të skadojë afati i ri, shkruan BBC.
Ai la në fuqi një tarifë globale prej 10%, e cila përfshinte edhe Mbretërinë e Bashkuar, megjithëse aleati i hershëm i Amerikës nuk i nënshtrohej tarifave më të larta “reciproke” të administratës. Mbretëria e Bashkuar i nënshtrohet gjithashtu një takse prej 25% të importit amerikan për çelikun, aluminin dhe makinat. Sipas raportimeve, Uashingtoni është afër arritjes së marrëveshjeve tregtare me Indinë dhe Izraelin.Administrata po vazhdon gjithashtu bisedimet me disa vende të tjera, përfshirë Japoninë, Korenë e Jugut dhe Vietnamin.
Trump ka thënë se dëshiron që kombet të arrijnë marrëveshje të reja me SHBA-në, ndërsa ai përpiqet të riformësojë rrënjësisht sistemin global tregtar. Këtë javë, SHBA-të dhe Kina njoftuan se zyrtarët e tyre të lartë tregtarë do të fillojnë bisedime në përpjekje për të ulur tensionet midis dy ekonomive më të mëdha në botë. Zëvendëskryeministri kinez He Lifeng do të marrë pjesë në bisedimet në Zvicër nga 9 deri më 12 maj, tha Ministria e Punëve të Jashtme e Kinës.
Sekretari i Thesarit i SHBA-së, Scott Bessent, dhe Përfaqësuesi i Tregtisë i SHBA-së (USTR) Jamieson Greer do të përfaqësojnë Uashingtonin në takim, njoftuan zyrat e tyre. Që kur u rikthye në Shtëpinë e Bardhë, Trump ka vendosur taksa të reja importi për mallrat kineze deri në 145%. Pekini është kundërpërgjigjur me taksa për disa mallra nga SHBA-ja prej 125%.
Ky do të jetë takimi i parë i nivelit të lartë midis dy vendeve që kur zëvendëspresidenti kinez Han Zheng mori pjesë në inaugurimin e Trump në janar. Por ekspertët e tregtisë globale i kanë thënë BBC-së se presin që negociatat të zgjasin disa muaj. Veçmas, Mbretëria e Bashkuar dhe India ranë dakord për një marrëveshje tregtare më parë këtë javë, e cila do ta bëjë më të lehtë për firmat britanike të eksportojnë uiski, makina dhe produkte të tjera në Indi, si dhe do të ulë taksat mbi eksportet e veshjeve dhe këpucëve të Indisë.
j.l./ dita
