Si rezultat i Megaoperacionit të Policisë së Shtetit janë vënë në pranga gjatë gjithë natës së mbrëmshme dhe deri në orët e para të mëngjesit 233 shpërndarësve të drogës, të cilët kishin në shënjestër të veprimtarisë së tyre kriminale nxënësit e shkollave, teksa 82 të tjerë janë shpallur në kërkim.
Drejtor i Policisë së Shtetit, Muhamet Rrumbullaku në një konferencë për mediat ka dhënë detaje në lidhje me megaoperacionin ku ka deklaruar se pas një hetimi të imtësishëm e mbledhjeje të provave në të gjitha qarqet e vendit, janë shkatërruar 23 rrjete kriminale në qytetet si Tiranë, Vlorë, Elbasan, Durrës dhe në Korçë dhe është neutralizuar një burim i rrezikshëm dëmi për shëndetin e më të rinjve, ndërkohë që kjo është një tjetër provë e ngritjes së luftës kundër krimit të organizuar në një nivel të ri.
Rrumbullaku bëri me dije se policia ka ushtruar kontrolle në 356 banesa, ndërsa ka shpallur në kërkim 82 persona. Falë këtij operacioni, janë sekuestruar lëndë narkotike e llojit kokainë, heroinë, metadon, armë zjarri dhe armë të ftohta, telefona, etj,.
“Janë përmbyllur me sukses duke siguruar prova ligjore për shpërndarje të lëndëve narkotike.
Janë siguruar vendimet e masave të sigurisë, janë miratuar 296 masa sigurie, arrest me burg, u miratuan vendime për kontrollin e 356 ambienteve dhe banesave, u ekzekutuan 214 masa sigurimi, janë arrestuar në kushte flagrante dhe 19 persona të tjerë, në kërkim 82 persona.
Një pjesë e të arrestuarve pjesë e 23 grupeve kriminale. Janë sekuestruar lëndë narkotike heroinë, kokainë, armë zjarri dhe armë të ftohta, telefona“, tha Rrumbullaku.
