Një shqiptar ka mbetur i plagosur në Paxos të Greqisë. Bëhet fjalë për 51-vjeçarin Andrea Kalemi.
Kalemi kishte shkuar në Greqi për pushime.
Siç shkruajnë mediat greke, 51-vjeçari është plagosur në portin e Lakka-s. Dyshimet e para janë për larje hesapesh.
Autor i dyshuar i ngjarjes është një bashkatdhetar, i identifikuar nga autoritetet. Ky i fundit ka shkuar atje nga një ishull i Italisë.
Protothema shkruan se shqiptari u plagos pas një sherri që pati fillimisht mes dy personave.
Në momentin e krimit nuk ka pasur dëshmitarë, por disa persona thanë se dëgjuan një të shtënë dhe kur dolën jashtë panë një person të shtrirë në tokë. Pas kësaj 51-vjeçari u dërgua në spital ku ndodhet në gjendje të rëndë.
Policia po vijon hetimet për këtë ngjarje, ndërsa është shpallur në kërkim autori.
Dyshohet se plagosja e Kalemit ka lidhje me vrasjen e Edmond Papës.
Kush është Andrea Kalemi?
Shënjestra e djeshme në Greqi mbante dy emra Adriatik alias Andrea Kalemi.
Ndërkaq mësohet se Kalemi është kushëri i parë me Aleksandër Sadikajt, saktësisht djali i dajës së Aleksandrit, i cili mbeti i vrarë në një tjetër atentat me tritol në makinën e tij në zonën në afërsi të Saukut në Tiranë.
Ngjarja në fjalë ka ndodhur në 11 qershor të vitit 2022, ku makina me të cilën udhëtonte 27-vjeçari Aleksandër Sadikajt shpërtheu në ecje e sipër përmes një shpërthimi me telekomandë.
j.l./ dita
