Pesë administrator subjektesh të cilat shisnin paketa me kanale televizive në kundërshtim me ligjin janë arrestuar ndërsa policia po vijon punën për kapjen edhe të tre personave të tjerë.
Gjatë zhvillimit të operacionit policor “Dekoderi”janë sekustruar 45 dekoderë, 5 radio marrëse-dhënëse dhe 4 celularë.
Ndërkohë policia njofton se 10 subjekte të tjera janë verifikuar ndërsa veprimtaria e tyre është aktualisht në hetim.
Nga verifikimet dhe hetimet e deritanishme rezultoi se këta shtetas shitnin online, në kundërshtim me ligjin, paketa me kanale televizive. Ata mashtronin qytetarët se posedonin të drejtat televizive të ketyre kanaleve dhe nëpërmjet dekoderëve, kryenin dekodifikimin dhe transmetimin e programacioneve.
“Në kuadër të planit operacional të koduar “Dekoderi”, u vunë në pranga shtetasit A. S., 28 vjeç, A. V., 40 vjeç, A. L., 45 vjeç, F. Ç. alias F. B., 28 vjeç dhe E. Xh., 33 vjeç, të gjithë banues në Tiranë. Gjithashtu, u identifikuan dhe u shpallën në kërkim shtetasit A. Q., 40 vjeç dhe A. Sh., 33 vjeç, të dy banues në Tiranë.
Më tej, në kuadër të këtij plani operacional, Seksioni për Hetimin e Krimeve Kibernetike kreu verifikime për një tjetër subjekt online, mbi dyshime për këtë paligjshmëri. Në përfundim të këtyre veprimeve u identifikua dhe u shpall në kërkim administratori i subjektit, shtetasi B. K.”,-thuhet në njoftimin e policisë.
i.b./dita
