“Mund të jetë duke iu afruar një faze kritike”. Ky ishte paralajmërimi që shkencëtarët dhanë shtatë vjet më parë për Campi Flegrei, krateri vullkanik që ndodhet vetëm nëntë kilometra larg qytetit të Napolit (Itali). Në vitin 2017, ata folën në të njëjtën mënyrë, duke siguruar se “ishte bërë më e rrezikshme”.
Tashmë, mesazhi për situatën e këtij krateri italian, i konsideruar si supervullkani më i madh në Europë, kalon në shqetësimin e autoriteteve për “shenjat e riaktivizimit” të shfaqura nga vetë vullkani. Shpërthimi i fundit i këtij ‘supervullkani’, dimensionet e të cilit arrijnë 14 kilometra në diametër dhe ka 24 kratere të ndryshme, ka ndodhur 500 vjet më parë.
Lidhur me procesin e shpërthimit, aktiviteti i tij filloi 3900 vjet më parë, kur ndodhi shpërthimi më i madh që përfshin një vullkan europian. Në atë kohë, ajo nxori 200 kilometra kub magmë dhe hiri i saj arriti në një sipërfaqe prej 3.7 milionë kilometra katrorë. Krateri, nga ana tjetër, përmban shumë fumarole dhe disa pishina balte të vluar, plus kone të ndryshme dhe kratere ndihmës që shtrihen në vatër.
Një studim i kryer së bashku nga studiues të Kolegjit Universitar të Londrës dhe Instituti Kombëtar Italian i Kërkimeve të Gjeofizikës dhe Vullkanologjisë, i botuar në revistën shkencore “Nature Communications Earth & Environment”, kreu analizën e tyre me të dhëna të reja mbi ndryshimet në numrin e tërmeteve lokale. “Ne parashikuam në vitin 2016 që afrimi ndaj shpërthimit do të vazhdonte pas një ngritjeje shtesë prej 30-40 cm në vendin e lëvizjes më të madhe”, theksuan ata.
Po kështu, autorët e studimit theksuan se ato kratere, aktiviteti i të cilëve fillon të shfaqet pas një pushimi të gjatë, “duhet të thyejnë koren” përpara se magma të shpërthejë. “Puna jonë e re konfirmon se Campi Flegrei është afër përfundimit. Megjithatë, kjo nuk do të thotë se një shpërthim është i garantuar”, tha autori kryesor i studimit, Christopher Kilburn.
