FUSHË-KRUJË – Një shpërthim i fuqishëm me lëndë plasëse ka tronditur fshatin Zallë në Fushë-Krujë gjatë orëve të natës, duke pasur si objektiv banesën dhe automjetin e 49-vjeçarit Ylli Zalla.
Nga shpërthimi janë shkaktuar dëme të konsiderueshme materiale në hyrjen e shtëpisë, ndërsa automjeti tip “Mercedes-Benz” i parkuar pranë saj është djegur plotësisht.
Ngjarja ka marrë përmasa të reja publike dhe hetimore pas reagimit të vetë Ylli Zallës, i cili shfaqet në një video përballë banesës së dëmtuar duke pretenduar se jeta e tij është në rrezik nga përplasjet me bandat dhe strukturat e policisë, ndërsa deklaron se “nuk kërkon azil politik”.
Kush është Ylli Zalla?
Ylli Zalla nuk është një emër i panjohur për drejtësinë. Ai prej disa muajsh ndodhet në kërkim zyrtar nga Policia e Shtetit. Emri i tij doli në skenë gjatë hetimeve për atentatin e dyfishtë të ndodhur në rrethrrotullimin e Rinasit, ku mbetën të vrarë Gilmando Dani dhe ish-efektivi i AMP-së, Muçi Shaljani.
Gjatë kontrolleve të ushtruara më parë në banesën e tij, forcat e rendit zbuluan një arsenal të vërtetë luftarak, ku u sekuestruan: 4 armë zjarri (automatikë dhe pushkë) dhe pjesë armësh; 12 granata dore sulmuese dhe 3 kallëpe tritol; Mina me telekomandë të montuara me celularë dhe kapsolla detonatore; rreth 6,000 fishekë të kalibrave të ndryshëm dhe mbi 2 kg lëndë narkotike e llojit kanabis.
Dinamika e dyshimtë dhe pistat e hetimit
Pavarësisht pretendimeve të Zallës se ndaj tij po orkestrohet një sulm eliminues, grupi hetimor po ndjek disa pista paralel. Njoftimi i parë në polici për shpërthimin nuk është bërë nga banorë të zonës në momentin e ngjarjes, por paraditen e ditës së dytë nga bashkëshortja e Zallës, e cila ndodhej në Itali.
Hetuesit nuk përjashtojnë mundësinë që ngjarja të jetë inskenuar nga vetë i kërkuari apo persona të lidhur me të. Kjo me qëllim krijimin e provave artificiale se jeta e tij ndodhet në rrezik ekstrem në Shqipëri, për t’u përdorur më pas për përfitimin e statusit të azilantit politik jashtë vendit.
Në zonën ku ndodhi shpërthimi mungojnë kamerat e vëzhgimit, çka e bën më të vështirë identifikimin e menjëhershëm të autorëve të mundshëm.
d.x. / dita
Katundari i poshtër.