Ministri i Mbrojtjes, Niko Peleshi ftoi sot të gjithë të rinjtë e interesuar që të aplikojnë për t’u rekrutuar në Forcat e Armatosura.
“Shqipërisë i duhen më të mirët! Bëhu pjesë e Forcave të Armatosura dhe përfaqëso me krenari vendin tënd përkrah trupave të NATO-s, në ruajtje të paqes dhe sigurisë në botë”, u shpreh ministri.
Fillimisht, për të filluar procesin e rekrutimit i interesuari duhet të plotësojë një sërë kriteresh dhe dokumentesh.
Shtetasit që kërkojnë të aplikojnë për ushtarë/detarë aktivë në FA duhet të aplikojnë drejtpërdrejt në zyrën e pranimit në Qendrën e Personel Rekrutimit, e cila vijon procedurat e testimit dhe përzgjedhjes me kandidatët që janë gjykuar të aftë nga ana shëndetësore.
Të rinjtë do të kalojnë edhe tre teste, atë fizik, intelektual dhe psikologjik që do të kryhen në faza të caktuara.
Veç trajtimit financiar, çdo i kualifikuar për të vijuar karrierën brenda Forcave të Armatosura do të gëzojë edhe një sërë mundësish. Konkretisht ata përfitojnë të ardhura mujore dinjitoze, arsimim dhe aftësim profesional në vazhdim brenda dhe jashtë vendit, përgatitje fizike sipas standardeve të NATO-s, trajnime dhe stërvitje jashtë vendit së bashku me kolegët e tjerë të NATO-s dhe SHBA-së, dhe përfitime të tjera.
p.k\dita
