Nesër bulevardi do jetë si gjithnjë, i ngarkuar me njerëzit dhe mjetet e zakonshme. Shiu dhe era do marë lulet e vendosura një ditë më parë, familjarët do kthehen në hallet e tyre.
Në 21 janar 2011, pikërisht aty, ku duhej të ishte vendi më i sigurtë, mes dy “qeverive”, Legjislativit dhe Ekzekutivit, katër protestues paqësorë u vranë me urdhër të Kryeministrit. Dhjetëra u plagosën. Të tjerë u dhunuan në rrugë dhe nëpër komisariatet e policisë.
Pasi urdhëroi vrasjet, Kryeministri fshiu filmimet, manipuloi provat dhe pengoi drejtësinë.
Pafytyrësia dhe degjenerimi i tij moral janë të njohur. Sot janë edhe një perde e rëndë gjaku. E cila nuk i lejon shqiptarët të shohin qartë qeverinë.
Kjo e fundit, e vetëstolisur me virtyte që nuk i ka, premtoi edhe këtë 21 janar, “drejtësi”.
Duhet të jesh cipëplasur të dalësh e të ridalësh në rrugë, e të kujtosh të rënët, me të njëjtat fjalë.
13 vjet!
Sharlatanët që premtuan ndëshkimin, prokurorët, gjykatësit, media, shoqëria civile, sot janë të gjithë, të mbuluar nga turpi.
Tashmë jemi të gjithë pjesë e krimit, nga mosndëshkimi i tij.
_____
©Copyright Gazeta DITA
