FOTO VIDEO: Nuk ka dorëzim, as përçarje, rrugët e Tiranës sërish plot në ditën 17 të protestës. Ironizohet edhe Marta Kos

As lodhja e ditëve të gjata në shesh, as tentativat e vazhdueshme për përçarje apo ftohje të frymës qytetare, nuk e kanë zbehur qëndresën. Rrugët e Tiranës janë mbushur sërish plot pasditen e sotme, duke shënuar ditën e 17-të radhazi të protestës.

Mijëra qytetarë kanë marshuar dhe janë grumbulluar në pikat kyçe të kryeqytetit, duke dëshmuar se kauza e tyre po fiton një qëndrueshmëri që vështirë se mund të injorohet nga faktorët politikë, vendas apo ndërkombëtarë.

Nga sot orari i nisjes së protestës ka ndryshuar për shkak të temperaturave të larta nga 18.00 në 19.00. Është vendosur të mos ketë më shumë fjalime në podium.

Pjesëmarrësit, të pajisur me pankarta, flamuj dhe parulla, kanë përsëritur thirrjet e tyre kryesore, duke theksuar se nuk do të ketë asnjë hap pas deri në plotësimin e plotë të kërkesave.

Përtej retorikës politike, ajo që vihet re në këtë ditë të 17-të është një organizim më solid dhe një vendosmëri vërtetë mbresëlënëse.

​”Na thanë se do lodheshim, na thanë se do përçahemi, ja ku jemi sot, më shumë dhe më të bashkuar se javën e kaluar,” u shpreh një nga protestuesit, i cili dërgoi në redaksi videon e mëposhtme.

​Ironi dhe pankarta thumbuese për Marta Kos

Përveç mesazheve drejtuar qeverisë dhe institucioneve vendase, vëmendjen e gjerë të kësaj dite të protestës e ka marrë reagimi ndaj faktorit ndërkombëtar, ku në shënjestër ka përfunduar zyrtarja e lartë evropiane, Marta Kos.

​Në duart e protestuesve kanë spikatur pankarta me ironi të hollë dhe tone sarkastike, të cilat kryesisht kritikojnë qëndrimet e saj për Zvërnecin.

Sheshi ka përcjellë mesazhin se sytë e opinionit publik shqiptar janë mjaftueshëm të mprehtë për të kuptuar lojërat diplomatike.

Masiviteti i tubimit të sotëm tregon se kjo qëndresë ka hyrë në një fazë të re, edhe më të organizuar.

Në fundjavë pritet zhvillimi i një proteste mbarëkombëtare që do t’i kushtohet diasporës apo të larguarve nga Shqipëria dhe dëshirës së tyre për t’u rikthyer në atdhe.

DITA