Prokuroria e Posaçme Kundër Korrupsionit dhe Krimit të Organizuar (SPAK) ka identifikuar anëtarë të tjerë të një grupi të strukturuar kriminal, që trafikonte lëndë narkotike nga Amerika Latine drejt tregjeve italiane.
Grupi kriminal, i goditur më 5 nëntor 2024 në një operacion mes SPAK dhe Prokurorisë së Firences, shërbente si furnizues kryesor i tregut italian me drogë të trafikuar përmes kontejnerëve në portet e Livornos, Genovas dhe Savonas.
Hetimet në Shqipëri kanë zbuluar përfshirjen e shtetasit me iniciale K.B., i cili deri më tani nuk ishte identifikuar nga autoritetet italiane. Ky individ organizonte pritjen, magazinimin dhe shpërndarjen e drogës në Itali. Një rast konkret është sekuestrimi i 10.522 kilogramëve kokainë më 27 janar 2021, në një automjet të tipit Ford Fiesta në Autostradën Guardamiglio, Itali. Në këtë operacion u arrestuan shtetasit shqiptarë me iniciale E.K. dhe M.K.
Më 12 janar 2024, SPAK ka ekzekutuar masën e sigurisë të vendosur nga Gjykata e Posaçme për shtetasit me iniciale M.N. dhe J.K., të cilët ishin arrestuar më parë nga autoritetet italiane. Komunikimet mes K.B. dhe pjesëtarëve të tjerë të grupit kanë konfirmuar rolin e tij organizativ në këtë rrjet kriminal.
Hetimet vazhdojnë për zbardhjen e plotë të aktivitetit kriminal dhe arrestimin e anëtarëve të përfshirë.
j.l./ dita
