Dy policë spanjollë të pikës doganore në kufi me Gjibraltarin, javën e kaluar kanë shkaktuar një incident diplomatik teksa kanë hyrë brenda këtij territori që konsiderohet pronë e Britanisë së Madhe, gjatë një operacioni kundër kontrabandës.
Kjo është konsideruar nga autoritetet britanike si një nga incidentet më të rrezikshme deri më sot.
Në orët e para të mëngjesit të së martës, dy agjentë doganorë spanjollë u plagosën pasi u hodhën gurë në një plazh të Gjibraltarit.
Varka e tyre e vogël kishte humbur energjinë ndërsa ndiqte kontrabandistët e dyshuar të duhanit, sipas raporteve të mediave spanjolle.
Dy policët spanjollë kanë mbetur të plagosur si pasojë e të shtënave mes tyre dhe kontrabandistëve të cilët po ndiqnin.
Në një deklaratë të premten, kryeministri i Gjibraltarit Fabian Picardo tha se nga faktet rezuton se kemi të bëjmë me një shkelje të rëndë të sovranitetit britanik dhe, potencialisht, incidentin më serioz dhe më të rrezikshëm për shumë vite”.
Ai tha se Gjibraltarit i duhej të hetonte faktet përpara se të vendoste se çfarë përgjigje diplomatike të merrte, por shtoi se ngjarjet tregojnë se veprimet e zyrtarëve spanjollë janë të patolerueshme.
Qeveritë e Gjibraltarit dhe Mbretërisë së Bashkuar konsiderojnë se ngjarjet do të kërkojnë shqyrtim të kujdesshëm për sa i përket natyrës dhe nivelit të reagimit diplomatik.
Nëse konfirmohet se zyrtarët spanjollë kanë shkarkuar armët e tyre në Gjibraltar, kjo do të ishte një shkelje shumë e rëndë e ligjit, thonë autoritetet vendase.
Ministria e Jashtme e Spanjës dënoi të premten sulmin ndaj agjentëve doganorë, të cilët kishin pësuar lëndime të rënda dhe tha se refuzon kategorikisht kushtet e deklaratës së lëshuar nga Gjibraltari, si dhe pretendimet për sovranitetin e supozuar britanik mbi territorin dhe ujërat e Gjibraltarit që gjenden brenda tij.
m.b./dita
