I dërguari i Egjiptit në Bruksel kritikoi qëndrimin e Perëndimit për luftën Izrael-Hamas, duke e akuzuar atë për një pozicionim pro-izraelit, çka do të thotë se po dëmton reputacionin e tij në Lindjen e Mesme.
Në një intervistë në rezidencën e tij në Bruksel, kryediplomati i Kajros në kryeqytetin e BE-së, Badr Abdelatty, theksoi gjithashtu se vendi i tij nuk do të pranojë refugjatët palestinezë që ikin nga Gaza.
“Ne nuk do të lejojmë likuidimin e çështjes palestineze dhe të kemi një tjetër Nakba [“katastrofë” në arabisht, duke iu referuar çrrënjosjes masive të palestinezëve në luftën për krijimin e Izraelit në vitin 1948] në kurriz të vendeve fqinje, pavarësisht nëse këto janë Jordania apo Egjipti”, tha Abdelatty për Politico.
Pas sulmit të Hamasit më 7 tetor, kundërpërgjigjja e Izraelit në Gaza ka shkaktuar mijëra të vdekur civilë. Izraeli ka refuzuar thirrjet për armëpushim, ndërsa SHBA ka deklaruar se mbështet të drejtën e Izraelit për të mbrojtur veten.
Egjipti luan rol kyç në konfliktin midis Izraelit dhe Hamasit, pasi ofron një pikë hyrjeje për ndihmat humanitare për civilët në Gaza nëpërmjet pikës kufitare Rafah. Para luftës midis Izraelit dhe Hamasit, qindra kamionë ndihma shkonin në Gaza çdo ditë përmes pikës kufitare Rafah, ku shumica e territorit të pushtuar nga Izraeli është mbështetur që nga viti 2007, pasi Izraeli bllokoi kufijtë e tij tokësorë, ajrorë dhe detarë.
Që nga fillimi i luftës, kamionët e ndihmave kanë hyrë vetëm përmes pikës kufitare Rafah. Pak kohë më parë, Egjipti organizoi konferencën e paqes në Kajro. Diplomati egjiptian thotë se opinioni publik në Lindjen e Mesme e kritikon qasjen e Perëndimit në raport me konfliktin e riaktivizuar.
Sipas tij, “standardet e dyfishta” po minojnë reputacionin e Perëndimit në rajon.
“Opinioni publik në të gjithë rajonin është i tronditur, është shumë i mërzitur me këtë qëndrim të njëanshëm,” tha ai.
“Dhe është krijuar një bindje në opinionin publik në rajonin tonë se në sytë e Perëndimit jetët e perëndimorëve janë më të çmuara se jeta e palestinezëve.” /Respublica
p.c. / dita
