Drejtoria e Përgjithshme e Tatimeve (DPT bën të ditur sot se kompania “Starlink Albania”, kompania që ofron shërbim interneti përmes satelitit, nuk ka asnjë detyrim të papaguar.
Në një prononcim për ATSH-në, DPT deklaron se kompania “Starlink Albania” operon normalisht.
“”Starlink Albania” nuk ka detyrime të papaguara. Informacioni i ndarë në medie është i pavërtetë. Nga verifikimi i bërë në sistemin elektronik tatimor c@ts, “Starlink Albania” nuk ka asnjë detyrim të papaguar ndaj DPT-së“, thanë burime zyrtare të DPT-së.
“Starlink Albania” është një degë e kompanisë amerikane të hapësirës ajrore “SpaceX”, e cila nisi operimin në Shqipëri në prill të 2024-ës.
“Starlink tani në Shqipëri”, shkruante më 9 prill 2024 Elon Musk në rrjetin social “X”.
“Starlink” ofron internet me shpejtësi të lartë dhe me vonesë të ulët për përdoruesit në të gjithë botën. Aktualisht “Starlink” është aktiv në mbi 70 shtete të botës.
Ky shërbim është veçanërisht i favorshëm për banorët që jetojnë jashtë qyteteve, ku interneti kabllor është i vështirë për t’u lidhur.
i.b./dita
