Për herë të parë në histori kombëtarja e Norvegjisë është kualifikuar për në fazën çerekfinale të Kupës së Botës. Për ta bërë këtë të besuarit e trajnerit Stale Solbakken mposhtën 1-2 pesë herë kampionët e botës, Brazilin e Carlo Ancelotti, në mesnatën mes të dielës dhe të hënës me orën shqiptare.
Heroi i takimit për vikingët ishte Erling Haaland me dopietë, teksa sulmuesi i Manchester Cityt ngjitet në kuotën e shtatë golave këtë Botëror, aq sa kanë Lionel Messi dhe Kylian Mbappe. Nga ana tjetër, kjo humbje është një dramë për amerikano-latinët të cilët shohin mos jenë në çerekfinale për herë të parë që nga Botërori 1990.
NDESHJA
Përballja nisi mirë për Brazilin, teksa ‘Seleçao’ pa të fitonte një 11 metërsh pas vetëm 14 minutave lojë. Nga pika e bardhë u paraqit Bruno Guimaraes, por portieri i Norvegjisë, Nyland, ndali goditjen e fantazistit
Në disa momente Alisson në portën e Brazilit dhe Nyland në katërkëndëshin e Norvegjisë bënë pritje shpëtimtare, për t’i lënë emocionet në fundin e duelit. Në minutën e 79-të, një krosim i Schjelderup nga e majta e sulmit bëri që Erling Haaland të kërcente mbi të gjithë duke kaluar Norvegjinë në avantazhin 0-1.
Kaq u desh që Brazili të zgjohej, por një ‘ping-pong’ në zonë dhe një top që po shkonte drejt rrjetës u ndal nga portieri i evropianëve. Norvegjia nuk u ndal dhe vijoi lojën e saj. Në minutën e fundit, Haaland mori sërish një pasim nga Schjelderup, vështroi portën nga kufijtë diagonal të zonës dhe nga vendi lëshoi një ‘predhë’ me të majtën që u ndal në fundin e rrjetës së Alisson për herë të dytë. 0-2 dhe festa ishte legjitime për Haaland me shokë.
Në shtesën e dhjetë të ndeshjes, pas një ndërhyrje të gabuar në zonë, Brazili fitoi 11 metërshin e dytë të ndeshjes. Neymar nuk gaboi dhe shkurtoi shifrat për 1-2, por nuk kishte më kohë dhe pas 100 minutash lojë ishte Norvegjia që siguroi biletën për në fazën çerekfinale të Botërorit 2026. Në pesë përballjet mes tyre në histori, Brazili nuk ka fituar asnjë sfidë kundër Norvegjisë.
j.l./ dita
