Real Madridi ka bërë të ditur zyrtarisht rikthimin e Jose Mourinhos në krye të skuadrës.
Klubi spanjoll publikoi të enjten një komunikatë zyrtare, duke i dhënë fund çdo spekulimi rreth emrit që do të merrte drejtimin e “Los Blancos”.
“Bordi i Drejtorëve i Real Madridit, i mbledhur sot të enjten më 11 qershor dhe i kryesuar nga Florentino Pérez, ka vendosur të emërojë Jose Mourinhon trajner të ekipit të parë për tre sezonet e ardhshme, deri më 30 qershor 2029”, thuhet në deklaratën e klubit.
Sipas njoftimit, Jose Mourinho do t’i bashkohet Real Madridit më 13 korrik, ditën kur nis faza përgatitore për sezonin e ri.
Ky do të jetë një rikthim i rëndësishëm i trajnerit portugez në “Santiago Bernabeu”, pas më shumë se një dekade mungesë. Mourinho ka drejtuar Real Madridin nga viti 2010 deri në vitin 2013, periudhë gjatë së cilës fitoi një La Ligë, një Kupë Mbreti dhe një Superkupë të Spanjës.
Gjatë mandatit të tij të parë, ai ndërtoi një skuadër shumë konkurruese që i dha fund dominimit të Barcelonës së Pep Guardiolës në futbollin spanjoll. Sezoni 2011-2012 mbetet një nga më të suksesshmit në historinë e klubit, pasi Real Madridi e mbylli kampionatin me 100 pikë dhe 121 gola të shënuar.
Rikthimi i Mourinhos vjen pas një periudhe zhgënjyese për madrilenët, të cilët nuk kanë arritur të fitojnë trofe të rëndësishëm në dy sezonet e fundit.
Presidenti Florentino Pérez e sheh portugezin si figurën ideale për të rikthyer mentalitetin fitues dhe disiplinën konkurruese brenda skuadrës.
Tashmë vëmendja zhvendoset te merkatoja verore, ku pritet që Mourinho të ketë ndikim të madh në ndërtimin e ekipit për sezonin 2026-2027.
j.l./ dita
