Të akuzuar për shit-blerje votash në zgjedhjet vendore, GJKKO jep vendimin për Kristo Agalliun dhe Agron Durajn

Gjykata e Posaçme e Shkallës së Parë për Korrupsionin dhe Krimin e Organizuar dha vendimin sot Kristo Agalliun dhe Agron Durajn, të akuzuar për korrupsion në zgjedhje.

GJKKO ka dënuar me 8 muaj burg Kristo Agalliun dhe vënien në provë për 16 muaj të Agron Durajt, të dy akuzuar për  “korrupsion në zgjedhje”.

SPAK paraqiti më 28 shtator pranë GJKKO-së dërgimin për gjykim të çështjes së ngarkim të Durajt dhe Agalliut.

GJKKO vendosi fillimisht nga 1 vit burg për Agalliun dhe Durajn, të cilat u konvertuan në 8 muaj, dhë në përfundim, ndaj Agron Durajt u vendos vënia në provë për një periudhë kohe prej 16 muajsh, me kusht që të mos kryejë vepër tjetër penale.

1. “Prokuroria e Posaçme kundër Korrupsionit dhe Krimit të Organizuar më datë 28.09.2023 ka paraqitur pranë Gjykatës kërkesën me objekt: Dërgimin për gjykim të ҫështjes penale në ngarkim të të pandehurit Kristo Agalliu akuzuar për figurën e veprës penale“Korrupsioni aktiv në zgjedhje”, parashikuar nga neni 328 i Kodit Penal dhe të pandehurit Agron Durraj akuzuar për figurën e veprës penale“Korrupsioni pasiv në zgjedhje”, parashikuar nga neni 328/b i Kodit Penal.
2. Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Rudina Palloi, Erjon Bani dhe Atalanta Zeqiraj, me vendimin Nr. 84, datë 18.12.2023 vendosi:
3. Deklarimin fajtor të të pandehurit Kristo Agalliu, për veprën penale të “Korrupsioni aktiv në zgjedhje”, parashikuar nga neni 328 i Kodit Penal dhe në bazë të kësaj dispozite, dënimin e tij me 1 (një) vit burgim.
4. Në zbatim të nenit 406/1 të Kodit të Procedurës Penale, të pandehurit Kristo Tahir Agalliu, i ulet 1/3 (një e treta) e dënimit të dhënë, duke u dënuar përfundimisht 8 (tetë) muaj burgim.
5. Vuajtja e dënimit të kryhet nga i pandehuri Kristo Agalli në një burg të sigurisë së zakonshme.
6. Deklarimin fajtor të të pandehurit Agron Duraj, për veprën penale të “Korrupsioni pasiv në zgjedhje”, parashikuar nga neni 328/b i Kodit Penal dhe në bazë të kësaj dispozite, dënimin e tij me 1 (një) vit burgim.
7. Në zbatim të nenit 406/1 të Kodit të Procedurës Penale, të pandehurit Agron Duraj, i ulet 1/3 (një e treta) e dënimit të dhënë, duke u dënuar përfundimisht 8 (tetë) muaj burgim.
8. Në zbatim të nenit 59 të Kodit Penal, urdhërohet pezullimi i ekzekutimit të vendimit me burgim dhe vënien në provë të pandehurit Agron Duraj për një periudhë kohe prej 16 (gjashtëmbëdhjetë) muajsh, me kusht që i pandehuri të mos kryejë vepër tjetër penale. Gjatë kësaj kohe i pandehuri të mbajë kontakte me Drejtorinë e Shërbimit të Provës që mbulon vendbanimin e tij nga e nesërmja e shpalljes së këtij vendimi.
9. Shpenzimet proceduriale të bëra gjatë hetimeve paraprake dhe ato gjyqësore i ngarkohen të pandehurve në mënyrë solidare.
10. Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar, brenda 15 (pesëmbëdhjetë) ditëve, duke filluar ky afat nga e nesërmja e njoftimit të këtij vendimi”, thuhet në njoftim.

Pas publikimit të një videoje në rrjetet sociale ku dy bashkëbiseduesit Agalliu dhe Duraj komunikonin për pazare votash në favor të një subjekti politik, policia arrestoi 52-vjeçarin Kristo Agalliu dhe procedoi në gjendje të lirë 61-vjeçarin Agron Duraj. Kujtojmë se më 29 shtator GJKKO caktoi masën e sigurisë “arrest shtëpie” për Kristo Agalliun, ndërsa SPAK kërkoi të lihej në burg.

p.k\dita