Real Madrid e mbylli në barazim 1-1 gjysmëfinalen e parë të Champions League përballë Manchester City. Eurogoli i Vinicius Junior solli avantazhin, por e djathta fantastike e Kevin De Bruyne evitoi humbjen e skuadrës së Guardiolës.
Thibaut Courtois, një nga pikat më të forta të “Los Blancos”, e cilëson pozitiv rezultatin e arritur në “Santiago Bernabeu”. “Gardiani” belg analizoi duelin e parë, ku ndër të tjera tha: “Të dyja skuadrat luajtën mirë. Nuk u lejuam hapësira lojtarëve si Gundogan dhe Bernardo Silva. Për pasojë, ata e tentuan golin me goditje nga larg, dhe në atë mënyrë shënuan. Barazimin e cilësoj rezultat të mirë. Ndeshja e kthimit do të jetë si finale. Luajmë në transfertë, do e kemi shumë të vështirë përballë tyre. Por, ne jemi të frikshëm në ndeshjet finale, gjë që nuk duhet ta harrojmë”, theksoi portieri i Realit.
Por detaji që tremb tifozët dhe opinionistët është statistika kokëfortë se “Los Blancos” nuk e kanë kaluar asnjëherë turin dytakimsh nëse kanë barazuar në ndeshjen e parë, si në këtë rast dhe për më tepër kur luajnë ndaj një skuadre të fortë si Citi dhe jo vetë kaq, pasi kthimi është në Angli. Por statistikat janë bërë për t’u thyer dhe gjithnjë ka herë të parë.
