Kreu i ISSH reagon për shkrimin mbi praktikën johumane me të moshuarit

Nga Johana Lubonja

Kreu i ISSH-së, Astrit Hado ka reaguar ndaj shkrimit për pensionistët botuar në faqen e parë të Ditës të shtunën.

Bëhet fjalë për shkrimin me titull “Ftesë ISSH-së për të ndryshuar një praktikë aspak humane” ku përshkruhet detyrimi i pensionistëve për t’u paraqitur dy herë në vit për të vërtetuar se janë “gjallë”.

Z.Hado i shkruan redaksisë:

​Astrit Hado: “Është një herë në vit në bankë dhe një herë në e-Albania. Nuk quhet deklaratë gjallese, por deklaratë e konformitetit të pagesës. Kemi vite që vijmë vërdallë me AKSHI-n që të na bëjë një program ‘face recognition’, por akoma s’e kanë bërë. Ne nuk i lëmë dot pa verifikuar, sepse kemi shumë që jetojnë jashtë, ndërrojnë jetë atje dhe nuk çregjistrohen në gjendjen civile.”

E falënderojmë kreun e ISSH-së, për reagimin e tij të shpejtë dhe, mbi të gjitha, për sinqeritetin e tij të rrallë zyrtar. Një drejtues institucioni pranon hapur se “vijnë vërdallë me AKSHI-n” prej vitesh për një zgjidhje teknologjike. Jemi të bindur që ai nuk po mbron institucionin e tij.

Ai ridëshmon një të vërtetë që ne e ndiejmë çdo ditë. Burokracia po fiton mbi teknologjinë.

Zoti Hado ka të drejtë kur thotë se institucioni duhet të sigurohet që paratë shkojnë te personi i duhur. Askush nuk kërkon që buxheti i shtetit të shpërdorohet. Por, pyetja jonë, e shtruar me dashamirësi dhe në emër të mijëra të moshuarve, mbetet: Pse duhet ta paguajë pensionisti brenda Shqipërisë koston e kësaj “vërdallosjeje” institucionale

Arsyetimi se kjo procedurë bëhet sepse ka njerëz që ndërrojnë jetë jashtë shtetit dhe nuk çregjistrohen, nuk mund të jetë “faturë” që duhet ta shlyejë me këmbët e veta pensionisti që jeton në Tiranë, Shkodër apo Vlorë.

Shteti shqiptar ka ambasada, ka konsullata, ka marrëveshje ndërshtetërore dhe miliona euro të investuara në sisteme ndërlidhjeje. Pse barra e dështimit të komunikimit mes këtyre zyrave tona nëpër botë duhet t’i mbetet si barrë prindit tonë të moshuar që duhet të paraqitet “për konformitet” në bankë për të vërtetuar se merr frymë

Nuk mund të vuajnë ata që janë këtu, për paaftësinë e shtetit për të kontrolluar ata që janë jashtë.

​Nëse “Shqipëria Dixhitale” është krenaria jonë nëpër podkaste, si ka mundësi që nuk u gjetka një zgjidhje e thjeshtë që e ka çdo aplikacion bankar sot? Zoti Hado thotë se “nuk quhet dëshmi gjallësie”. Ne i besojmë. Por për një të moshuar me probleme shëndeti, çdo rrugë drejt bankës, pavarësisht emrit që i vë burokracia, ndjehet njësoj. Një mundim i panevojshëm, një veprim dehumanizues.

Ftesa jonë për ISSH-në mbetet e hapur dhe dashamirëse. Në vend që të presim AKSHI-n që “të kujtohet”, a nuk mundet ISSH-ja të bëhet avokati i parë i këtyre njerëzve? Të kërkojë me forcë që verifikimi të bëhet në rrugë operative mes shtetit, përmes ambasadave për ata jashtë dhe përmes Gjendjes Civile për ata brenda, pa i detyruar prindërit tanë të “dëshmojnë konformitetin” me këmbët e tyre.

Zoti Hado, teknologjia nuk vlen asgjë nëse nuk kursen asnjë hap të atij që ka punuar një jetë të tërë në këtë vend. Le ta kthejmë këtë sinqeritet tuajin në një nismë që “një herë në vit” të bëhet “asnjëherë në sportel”.

Ne jemi gati t’ju mbështesim me çdo germë në këtë betejë për dinjitetin e tyre.
​