Një aplikacion i quajtur “Tellonym” që premton se lejon të shkruash dhe të jesh “sekret”, ka bërë shumë fëmijë të bien pre e bullizmit në Tiranë.
Bashkëmoshatarët e etiketojnë njëri-tjetrin me emër mbiemër se me kë kanë krijuar marrëdhënie intime në shkollë dhe jo vetëm.
Emisioni investigativ Fiks Fare ka vëzhguar për ditë me radhë këto faqe të cilat nuk shërbejnë për asgjë tjetër përveçse për të etiketuar dhe shpifur për njëri-tjetrin, sigurisht duke shfrytëzuar anonimatin që të ofron aplikacioni.
Fjalori i përdorur nga adoleshentët dhe të miturit nëpër statuse është banal dhe fyes. Në shumë statuse lexohen kërcënime qe adoleshentët i bëjnë njëri-tjetrit , ku kërkojnë domosdo identitetin, në mënyrë që të hakmerren.
Investigimi i Fiksit nisi pasi shumë prindër kërkuan ndihmën e gazetarëve sepse institucionet nuk vepronin dhe fëmijët nuk donin të shkonin në shkollë nga frika e shantazhimit.
Tomi Kallanxhi, ekspert IT, tregoi për Fiksin se edhe pse statuset dalin anonim, mund të shkohet tek personi që i hap këto faqe, pasi sipas tij nëse i bëhet një kërkesë aplikacionit ata përgjigjen, po ashtu AKEP mund të bëjë mbylljen e tyre.
Ndërsa psikologia Denada Toçe, ngre alarmin se këto aplikacione duhen mbyllur. “Tek unë kanë ardhur shumë raste që fëmijët nuk duan të shkojnë në shkollë për shkak të bullizimit” thotë znj.Toçe.
Të gjendur para këtyre fakteve gazetarët e Fiksit kërkuan përgjigje në Agjencinë Kombëtare të Fëmijëve. Kjo e fundit thotë se nuk ka dijeni për rastin, dhe nëse gazetarët do i dërgojnë linqet e adresave atëherë do adresohet mbyllja e tyre.
Në Policinë e Shtetit ka pasur ndërkohë dhjetëra denoncime për rastet.
a.m/dita
