Lista Serbe, partia më e madhe e serbëve në Kosovë, ka thënë këtë të hënë se do të marrë pjesë në zgjedhje, që eventualisht do të mund të mbahen për komunat në veri, kur t’i plotësohen dy kushte.
Ajo kërkon që forcat speciale të Policisë së Kosovës të tërhiqen nga veriu i Kosovës, dhe e dyta, të formohet Asociacioni i komunave me shumicë serbe.
Kosova dhe Serbia kanë arritur marrëveshje për Asociacionin më 2013, por më 2015, Gjykata Kushtetuese e Kosovës ka gjetur se marrëveshja nuk është në harmoni me Kushtetutën.
Qeveria e Kosovës aktualisht është deklaruar kundër një asociacioni njëetnik.
Lista Serbe i ka bojkotuar zgjedhjet e mbajtura për kryetarë të komunave në veri – Mitrovicë e Veriut, Zveçan, Zubin Potok dhe Leposaviq – dhe nuk i njeh kryetarët e rinj shqiptarë.
Ajo ka përmendur edhe nevojën për lirimin e dy serbëve të paraburgosur nga autoritetet e Kosovës, ditë më parë, gjatë përleshjeve në Zveçan.
Faktori ndërkombëtar ka bërë thirrje të vazhdueshme për marrjen e hapave drejt uljes së tensioneve. Disa diplomatë kanë kërkuar mbajtjen e zgjedhjeve të reja në veri.
p.k\dita
