Një tërmet i fortë u regjistrua mëngjesin e sotëm në Evia në Greqi. Tërmeti me magnitudë 5.1 është ndjerë edhe në Atikë. Mediat greke shkruajnë se për pasojë shkollat në Mantoudi, Limni, Agia dhe Anna janë mbyllur.
Pak minuta më vonë, pasuan një sërë pasgoditjesh me magnitudë 3.7 të shkallës Rihter.Sizmologët janë shprehur të shqetësuar për pasgoditjet, ndonëse autoritetet bëjnë me dije se janë në gatishmëri.
Tërmeti shkaktoi panik te qytetarët të cilët kanë lënë me shpejtësi banesat e tyre dhe kanë dalë në rrugë.
Nënkryetari i bashkisë së zonës, Yiannis Kantzouras shprehet se dëmet e shkaktuara nga tërmeti mund të jenë të mëdha.
“Tërmeti ishte shumë i fortë dhe zgjati shumë , të gjithë kanë dalë në rrugë, njerëzit po dridhen nga mundësia e një tërmeti më të madh. Kam frikë se do të kemi shumë dëme”, tha ai.
Ndërkohë guvernatori i qarkut të Greqisë qendrore, Fanis Spanos, bëri me dije se vazhdojnë kontrollet në zonë, dhe se në një rrugë në Evia Qendrore ka pasur rrëshqitje dherash.
“Është raportuar për xhama të thyer, sende që bien nga raftet e dyqaneve”, ka thënë ai.
p.k\dita
