Dr. Adem Harxhi
Shpesh, njerëzit kur janë afër me njëri-tjetrin janë shumë të zënë dhe nuk mendojnë për mënyrat si të sillen dhe të punojnë që të jenë një çift ashtu siç duhet. Ndërsa, tani që jeni larg, kuriozitetet, dëshirat dhe hobet e juaja të para në këtë vend të ri, mund të zbehin, ose të neglizhojnë shumë nga ato kujtime që keni pasur kur jetonit bashkë.
Në këto kushte, mund të ndodhë që, aksidentalisht, të hapet pak vend për të hyrë një person tjetër, i cili mund të bëhet pjesë e jetës tuaj. Vizitoni muzeumet, shkoni në kinema, ose shfaqje të ndryshme, madje, shkoni në ato që gruas nuk i pëlqente të shkonit bashkë!
Miqësohuni me njerëz të tjerë, por të kuptohemi, si persona, jo si partnerë. Nëse ndjeheni të uritur (dhe jo vetëm për shoqëri), përpiquni të gjeni një restorant tjetër, ose mësoni të gatuani për veten tuaj. Kthejeni vetë-seksin, ose masturbacionin në një hobi.
Kur vetë – gatimi nuk u pëlqen, ka plot hobe të tjera që t’i provoni. A merreni me ndonjë sport? A jeni tipa artistikë e krijues që pikturoni, bëni muzikë, shkruani poezi? Përdoreni imagjinatën në shumë mënyra për të bërë atë që u intereson dhe u jep kënaqësi. Sa më shumë gjëra të reja të bëni, aq më shumë do të keni çfarë t’i tregoni njëri-tjetrit kur të bashkoheni.
Nuk e keni vënë re në internet, se sa shumë njerëz në emigracion shkruajnë volume të tëra me poezi? Kjo nuk është kot, është mënyrë për të luftuar me vetminë.
Këto që ju shkruajta vlejnë për të dy, gjatë kohës që jeni larg. Mundohuni ta gjeni veten, shfrytëzoni mbështetjen e miqve të mirë dhe trajtojeni atë mbështetje drejtë. Në qofte se ndjeni se kjo nuk do të zgjidhet shpejt, kërkoni një konsultim psikologjik.
Dëgjoni dhe këto fjalë të fundit. Mos lejoni që dashuria në distancë të bëhet një vuajte fizike.
Ndonëse, të rinjtë kur ndahen, i premtojnë njëri-tjetrit “besnikëri të madhe” dhe se “marrëdhënia e tyre do t’i mbijetojë largësisë”, e vërteta është se fare pak prej tyre, veçanërisht, burrat në emigrim, e mbajnë premtimin.
Në det ka shumë peshq për t’i provuar. Përkushtimin tek dashuria dhe tek marrëdhënia, vetëm, pak njerëz e bëjnë, veçanërisht, në këtë moment të jetës, kur të dy provojnë një pavarësi të re.
Statistikat në Botë tregojnë se edhe në rastet kur çiftet jetojnë afër njëri-tjetrit, madje, bëjnë, siç thonë ata vetë, jetë të lumtur, mbi 50% e burrave dhe pothuaj po aq gra, fatkeqësisht, e tradhtojnë njëri tjetrin.
Mendoj se ka gjëra që duhet t’i bëni dhe gjëra që nuk duhet t’i bëni.
- Është mirë të jeni realistë e të mos shpresoni për gjëra që në të vërtetë nuk arrihen.
- Është mirë të jeni të hapur për të takuar njerëz të rinj
- Është mirë të jeni të ndershëm me veten dhe me të tjerët.
Por
- Nuk është mirë t’i harxhoni të gjitha paratë për telefonata.
- Nuk është mirë të injoroni të gjithë ata që u duken interesantë dhe ju tërheqin.
- Nuk është mirë ta jetoni jetën tuaj në atë mënyrë, që të ndjeheni të mërzitshëm. Mbani mend, në qoftë se marrëdhënia në distancë nuk funksionon, kjo vërtet, është një trishtim i madh dhe i dhimbshëm, por prishja e marrëdhënies, në qoftë se duhet dhe atëherë kur duhet, krijon hapësirë për dikë tjetër, që e keni njohur dhe me të cilin jeni afruar. Paçi fat, për ta kapërcyer me sukses distancën që ju ndan.
—-
©Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
