Një tjetër person është vënë në pranga nga policia shqiptare në kuadër të një operacioni të nisur në Danimarkë ndaj një grupi kriminal me drejtues shqiptar, i cili trafikonte drogë në disa shtete europiane.
SPAK bën me dije se Shërbimet e Policisë Gjyqësore të Drejtorisë së Përgjithshme të Policisë Shtetit me vendim të GJKKO kanë arrestuar N.N pasi akuzohet për kryerjen e veprave penale të trafikimit të narkotikëve, në bashkëpunim në formën e grupit të strukturuar kriminal.
Më 3 korrik, janë vënë në pranga dhe 2 persona nën hetim, K.D., dhe A.M., gjithashtu të dyshuar për kryerjen e veprave penale të trafikimit të narkotikëve, të kryer në bashkëpunim në formën e grupit të strukturuar kriminale dhe kryerjen e veprave penale nga organizata kriminale.
Hetimet po zhvillohen nga SPAK në bashkëpunim me autoritetet e drejtësisë së Mbretërisë së Danimarkës.
Sipas njoftimit, personat e arrestuar në Shqipëri, dyshohen se janë pjesëtarë të një grupi të strukturuar kriminal, të cilët në kuadër të hetimeve të kryera në Danimarkë në lidhje me “Operacionin Goldfinger” dhe të zhvilluar gjatë viteve 2018-2019, dyshoheshin se kanë trafikuar, ruajtur, përpunuar dhe shpërndarë sasi të konsiderueshme lëndësh narkotike kokainë dhe marijuanë, duke vepruar kryesisht në Danimarkë, Suedi, Norvegji, Belgjikë, Holandë dhe Gjermani, ku si drejtues i grupit të strukturuar kriminal nga autoritetet daneze të drejtësisë është konsideruar Jetmir Kastrati (alias Sokol Krasniçi).
SPAK sqaron se “Në Danimarkë janë arrestuar, dërguar për gjykim dhe dënuar me burgim nga Gjykata e Kopenhagen, anëtarët kryesorë të grupit të strukturuar kriminal, ndërkohë në Shqipëri rezulton se nga Gjykata e Posaçme e Shkallës së Parë për Korrupsionin dhe Krimin e Organizuar janë dënuar me burgim për veprat penale penale “Pastrimi i produkteve të veprës penale ose veprimtarisë kriminale”, kryer në bashkëpunim, në formën e posaçme, atë të grupit të strukturuar kriminal, “Grup i strukturuar kriminal”, si dhe “Kryerja e veprave penale nga organizata kriminale dhe grupi i strukturuar kriminal”, parashikuar nga nenet 287, pika 1, gërmat “a”, “b” dhe “d” e 28/4, 333/a dhe 334/1 të Kodit Penal shtetasit Jetmir Kastrati (alias Sokol Krasniçi), Astrit Beqiri dhe Dhimitër Shkodrani”.
p.k\dita
