Donald Trump kërkon largimin e Volodymyr Zelenskyt nga drejtimi i Ukrainës. Presidenti amerikan ka ashpërsuar qëndrimin ndaj homologut ukrainas, duke e akuzuar se ka refuzuar vazhdimisht mundësitë për t’i dhënë fund luftës me Rusinë.
“U sugjeroj të zgjedhin një udhëheqës të ri që mund të arrijë një marrëveshje. Zelensky mund ta kishte përfunduar këtë luftë shumë herë. Mendoj se ka ardhur koha që Ukraina të ketë një president të ri”, tha ai.
Por kritikat e Trump nuk janë ndalur vetëm te drejtimi politik i Ukrainës. Kreu i Shtëpisë së Bardhë i ka dhënë një paralajmërim të fortë Kievit që të ndalojë sulmet ndaj rafinerive ruse të naftës, duke argumentuar se ato po shkaktojnë mungesa të karburanteve në tregjet ndërkombëtare.
“I thamë se mund të godasë objektiva të tjera në Rusi, por jo rafineritë. Kjo po krijon një problem botëror. Ai duhet t’i ndalojë menjëherë këto sulme”, shtoi Trump.
Deklaratat vijnë vetëm një ditë pasi presidenti amerikan njoftoi një marrëveshje me Moskën për të lejuar furnizimin e tregjeve botërore me naftë diesel ruse, përmes lehtësimit të sanksioneve.
Marrëveshja ka shkaktuar reagimin e ashpër të Zelenskyt, i cili ka kritikuar vendimin e Uashingtonit për lehtësimin e kufizimeve ndaj Rusisë.
Trump ka këmbëngulur se lufta mund të ishte shmangur dhe se Zelensky ka pasur disa mundësi për të arritur paqen. Presidenti amerikan ka kërkuar gjithashtu mbajtjen e zgjedhjeve të reja në Ukrainë, duke shtuar presionin ndaj Kievit.
j.l./ dita
