Një 18-vjeçare, e cila i mbijetoi gomones që u mbyt në kanalin që lidh Francën me Anglinë ka treguar momentet e tmerrit. Në një intervistë për Sky News, Heivin thotë se mjeti lundrues ishte i mbingarkuar, ndërsa në të ndodheshin edhe njerëz të armatosur.
Ajo konfirmoi se gomonia ku ndodhej u sulmua nga një grup rival emigrantësh, të armatosur me shkopinj dhe thika, ndërsa po përgatitej të nisej.
“Njerëzit po luftonin, njerëzit po shkeleshin me këmbë, ata po vdisnin dhe po hidheshin në det”, ka treguar e reja, e cili thotë se vetë ra në ujë, por u tërhoq nga një person tjetër në varkë.
Dy pasagjerë të tjerë që ranë në ujë, mes tyre edhe një vajzë e re, janë mbytur, ndërsa tre persona të tjerë vdiqën në varkë.
Heivin bën përgjegjës grupin rival, që siç shprehet ajo i rrëmbyen duke shkaktuar tragjedi.
“Nëse ata nuk do të kishin ardhur dhe nuk do të fillonin të luftonin, asgjë nga këto nuk do të kishte ndodhur”, ka treguar ajo.
Tragjedia ndodhi në orët e para të mëngjesit të së martës në ujërat pranë qytetit bregdetar francez të Wimereux. Në kohën kur mbërritën shërbimet e urgjencës, ishte e qartë se njerëzit kishin vdekur, si në varkë ashtu edhe në ujë.
“Rashë në ujë, por një burrë më ndihmoi të ngrihesha”, tha Heivin.
“Të gjithë po hipnin në bord dhe kishte shumë njerëz – mbi 110 vetë. Unë isha përpjekur të isha në front, por pasi rashë në ujë u ula në skajin e varkës dhe nuk shkova në anën tjetër – aty po luftonin njerëzit. Falënderoj Zotin që nuk u futa në pjesën e sipërme të gomones. Do të isha mbytur. Falënderoj Zotin për këtë çdo ditë”, tha ajo.
Heivin ka kaluar shtatë muaj duke udhëtuar nëpër Evropë që kur u largua nga Iraku. Ajo tha se donte të shkonte në Britani sepse “është një vend më i mirë për mua, padyshim për sa i përket gjuhës, por gjithashtu, në shumë mënyra të tjera, është më i mirë se pjesa tjetër e Evropës”.
Ajo ka bërë 30 përpjekje për të kaluar Kanalin, por ka dështuar çdo herë. Herë ka qenë policia franceze që ka shkatërruar varkat ndërsa herë të tjera skafi me të cilin ajo udhëtonte është prishur.
j.l./ dita
