Dy persona të dyshuar si autor të vrasjes së 33-vjeçarit Ramazan Mataj në Shkodër janë arrestuar. Bëhet me dije se të arrestuar janë babë e bir, teksa njëri mendohet të jetë autori dhe tjetri bashkëpunëtor.
Lidhur me ngjarjen, mësohet se janë shoqëruar edhe disa persona të tjerë që mund të kenë dijeni.
Burime zyrtare konfirmojnë se janë arrestuar autorët e dyshuar të ngjarjes, shtetasi Rustem Hasaj dhe djali i tij, Arjon Hasa.
Sipas informacioneve paraprake njëri prej tyre u arrestua teksa po tentonte të largohej jashtë vendit.
Ndërkohë që motivet që çuan në krimin e rëndë mbeten ende të paqarta.
Sipas hetimeve paraprake, autorët e dyshuar dyshohet se kanë përdorur një profil të rremë në rrjetet sociale për të nxjerrë viktimën nga banesa e tij. Ngjarja ka ndodhur rreth 1.2 kilometra larg shtëpisë së 33-vjeçarit. Pasi kishte zënë pritë, autori hapi zjarr ndaj automjetit të Matajt, duke e qëlluar me 29 plumba.
Viktima u gjet brenda në makinë nga një banor i zonës, i cili njoftoi autoritetet në orët e para të mëngjesit pasardhës.
Ramazan Mataj u ekzekutua më 4 janar 2025, në zonën e Dragoçit, ku u qëllua me breshëri plumbash brenda makinës së tij.
Një nga pistat e hetimit të ngjarjes lidhet me konflikte personale, përfshirë mundësinë e ngacmimeve ndaj vajzave në rrjetet sociale.
Hetimet janë në vazhdim për të zbardhur plotësisht rrethanat e ngjarjes dhe për të siguruar prova të mjaftueshme për ndjekjen penale të të dyshuarve.
j.l./ dita
