I mituri 16-vjeçar, i cili drejtonte një nga dy Jet Ski-të, që u përplasën aksidentalisht në plazhin e Llamanit, po lufton me vdekjen te Trauma, teksa sipas mjekëve disa herë ka rënë në situatë kritike për shkak të plagëve serioze nga përplasja dhe traumat e pësuara në kokë.
Ngjarja u regjistrua pasditen e 15 gushtit 2023, ndërsa 16 vjeçari K.Xh., sipas ‘Report TV’, u soll me helikopter në Tiranë. Gjatë mesnatës u raportua se ai kishte kaluar edhe në vdekje klinike, por mjekët arritën ta rikthenin në jetë dhe po e mbajnë nën kujdes mjekësor.
Sipas policisë, 16-vjeçari nga Tirana, dhe shoku i tij 17 vjeç, po nga Tirana dhe me dy të tjerë, janë futur në det me 2 mjete lundruese Jet Ski.
Gjatë manovrave, dyshohet se aksidentalisht dy mjetet lundruese janë përplasur me njëra-tjetrën dhe për pasojë u dëmtua rëndë K.Xh., që ishte drejtuesi i njërit mjet Jet Ski dhe pasagjeri, shtetasi D. K. Policia ka proceduar pronarin e mjeteve, pasi të rinjtë ishin në moshë të mitur dhe nuk duheshin lejuar të lundronin.
