Sot, Akademia Shqiptare e Arteve dhe Shkencave mbush 13 vite nga themelimi i saj. Dje, kjo Akademi, e mirëpritur në jetën akademike, kulturore e publike të vendit qysh nga themelimi i saj dhe e vlerësuar nga publiku i lexuar, mbajti Mbledhjen Vjetore të asamblesë së saj. Mbledhja nisi me një minute heshtje për humbjen e shkrimtarit të madh Ismail Kadare, i cili, qysh nga themelimi i saj më 17 dhjetor 2011 e deri në fund të jetës së tij, ka qenë President Nderi i kësaj Akademie.
Në fjalën e tij, presidenti deri dje në këtë funksion i kësaj Akademie, Prof. Fatos Tarifa, vuri në dukje disa nga arritjet kryesore në veprimtarinë akademike, artistike, letrare e shoqërore të Akademisë Shqiptare të Arteve dhe Shkencave në shërbim të së mirës publike, veçanërisht, gjatë vitit 2024. Në vijim, në diskutimet e tyre, Prof. Ethem Ruka, Prof. Emil Lafe, Prof. Pëllumb Xhufi, Prof. Paskal Milo, Prof. Luljeta Bozo, Prof. Bardhosh Gaçe, Prof. Llukan Puka, Kujtim Çashku, Mevlan Shanaj, Robert Radoja, Prof. Arjan Gjonça, Prof. Rudina Jasini, Prof. Xhevat Lloshi, Prof. Rami Memushaj, Prof. Myftar Barbullushi dhe anëtarë të tjerë të Akademisë, e vunë theksin në aspekte të veçanta të veprimtarisë së kësaj Akademie në fushat e tyre respektive të veprimtarisë krijuese, duke sugjeruar ide e mënyra të reja për thellimin dhe zgjerimin e veprimtarisë së Akademsë në funksion të misionit publik për të cilin ajo është krijuar e funksionon si një Akademi mbarëshqiptare e Arteve dhe Shkencave.
Kujtojmë se në këtë Akademi bëjnë pjesë disa nga personalitetet më të shquara të artit e të kulturës shqiptare, si Ermonela Jaho, Inva Mula, Mumtas Dhrami, Tedi Papavrami, si dhe një numër personalitetesh shkencore te huaja nga më të shquarit në kohën tonë, si Anthony Giddens, Craig Calhoun etj.
Akademia pranoi dje në radhët e saj dy anëtarë të rinj: Prof. Qemal Murati (gjuhëtar, Kosovë) dhe Prof. Sherif Bundo (ekonomist). Në përfundim të saj, mbledhja e Asamblesë së Akademisë Shqiptare të Arteve dhe Shkencave zgjodhi si president të saj të radhës Prof. Ethem Ruka dhe si President Elect shkrimtaren Diana Çuli. Prof. Marenglen Spiro, Prof. Arben Baboçi, Prof. Aleksandër Xhuvani dhe Prof. Evan Rroco u zgjodhën anëtarë të kryesisë së re të Akademisë.
Prof. Rexhep Qosja u zgjodh unanimisht President Nderi i Akademisë Shqiptare të Arteve dhe Shkencave.
